No.2805/2021-2022

Aizawl the 30th October, 2021 : Sample Registration System(SRS), Government of India in SRS Bulletin, October, 2021  a tih chhuahah Mizoram chu kum 2019 chhunga India ram pum a Nausen kum khat hnuai lam thi tlem ber na State a ni.

Hetiang dinhmun kan thlen theih na chhan chu mipuiten mithiam te thusawi an awih that avang leh kan tanhona that vang a ni. Health and Family Welfare department hnuaia thawktu hrang hrang te, a fawng vuantu National Health Mission hnuaia Reproductive and Child Health(RCH) leh programme hrang hrang a thawktute inpekna thuk tak avangte, Social Welfare, Women and Child Development, School Education, Rural Development, Public Health Engineering department etc te nena kan thawhho that avangte in hetiang dinhmun sang tak hi kan thleng thei a ni.

Nausen kum khat hnuai lam thi zat tehna hi Infant Mortality Rate (IMR) tih a ni a, Infant Mortality Rate hi ram pum leh state chhung mipui nawlpui hriselna dinhmun tehfung (indicator) pawimawh tak a ni. Government of India in SRS Bulletin, October, 2021-a a tihchhuah SRS bulletin 2019 ah Mizoram Infant Mortality Rate(IMR) chu 3 a ni. Nagaland State IMR - 3 nen ti tha ber kan ni. Pahnihna Sikkim  IMR– 5  leh Pathumna Kerala  state IMR - 6 a ni. Hetih lai hian India ram pum chawhrual a IMR chu 30 a ni a. North Eastern States pumpui chu National level IMR 30 aia hniam vek a ni hi alawmawm hle a ni.

Government of India in a tihchhuah Sample registration system report atanga Mizoram Infant Mortality Rate(IMR) dinhmun leh hma kan sawn dan chu hetiang hi a ni:
Kum 2016 ah 27,
Kum 2017  ah 15,
Kum 2018 ah 5 leh
Kum 2019 kum ah 3 niin pakhatna kan ni.