Vawiin chawhma khan Champhai DC Conference Hall-ah Electoral Roll Observer Pu B. Lalhmingthanga hovin Champhai District chhunga Electoral Roll ennawn kalpui mek chungchangah meeting neih a ni.

Pu B. Lalhmingthanga chuan ram roreltu turte tlang turin thlangtu tur dik tak an nih ngei theih nan electoral roll ennawn hna chu fimkhur taka kalpui a pawimawh thu a sawi a. ECI lam atangin kalphung duan sa vek angin officer-ten hna an thawk tur a ni a. An hna ah political party aiawhte leh NGO ten an lo puihbawm ngaih changte a awm thei a. Hna thawh thatlohna a awm pawhin inhrilhriat hrehloh turin meeting-a kalkawmte chu a sawm bawk.

Champhai DC charge la mek Pu Zoengsanga chuan political party leh tlawmngai pawlte thawhpuina chunga a lawm thu a sawi a. Roll a thun theih loh leh thun nawn te, thun ngei tur thun hmaih te a awmloh nan fimkhur a tul thu a sawi a. Nakum lawka VC inthlanah tuna electoral roll buaipui mek hi a pawimawh dawn avangin ngaihsak a tul thu a sawi bawk.

Vawiin meeting-ah hian ERO leh AERO-te, district chhunga VCP leh political party aiawhte, tlawmngai pawl YMA leh MHIP hruaitute leh chanchinthar lakhawmtute an tel a. Electoral roll ennawn mek a harsatna tawhte leh a sutkian dante sawiho a ni.

Draft Electoral Roll 2015-a a lan danin Champhai District chhunga Constituency panga chhungah voter 79,146 an awm a. Vote thlak thei chin mipa 38,981 leh hmeichhia 39,352 awmin, Service Voters hi 813 an awm bawk a ni.