Vawiin chawhnu dar khat khan YMA Champhai Sub-Headquarters hmalaknain Remna Ni champhaphak vawi 30-na lawmdan tur ngaihtuahin YMA Sub-Headquarters Hall, Tlangrawt, Champhaiah Remna Ni 2016 Organizing Committee an thukhawm a, Remna Ni hmandan tur programme tlangpui an duang nghal.

Meeting hi Organizing Committee Chairman Pu C. Lalbiakzauva, Sub-Headquarters YMA President-in a kaihruai a. Organizing Secretary Pu P.C. Lalrawnliana, Sub-Headquarters YMA Secretary ni bawk chuan Central YMA-in kaihhruaina a siamte sawifiahin kumin Remna Ni lawmna thupui atan ‘Remna mi tin tan (Peace for All)’ tih thlan a nih thu leh YMA kaihhruaina hnuaiah Remna Ni hi rampumah ropui taka lawm tum a nih thu a sawi a.

Remna Ni Pearl Jubilee hi June ni 30, zinglam dar sawm pakhatah Chhangphut Field-ah neih nise tiin Committee chuan a rel a. Khuallian atan Parliamentary Secretary, Pu T.T. Zothansanga, Champhai North bialtu MLA sawm nise a ti bawk. Committee chuan Programme chipchiar duang turin Sub Headquarters YMA hotute thu neihna a hlan a, Central YMA kaihhruaina bakah mipui tel tam theih dan tur ngaihtuah chunga programme siam tha a ti bawk. Remna Ni Pearl Jubilee pual hian District Hospital, District Jail leh Home hrang hrangah thilpek pek tum niin YMA leh Kohhran hrang hrang thalaite tan Blood Donation Camp buatsaih tum a ni bawk.