Vawiin chawhma dar 10:30 khan Champhai District Park Committee chu Champhai District Bawrhsap, Pu Vanlalngaihsaka, IAS hovin DC Conference Hall-ah an thukhawm a. Hringlang Tlanga District Park siam tura hmalakna kal mek leh hmachhawpte an thlir ho.

Meeting kaihruaitu, District Bawrhsap Pu Vanlalngaihsaka, IAS chuan Hringlangtlang chu Mizo pipute nuna hmun pawimawh tak, mithi khaw kalkawng a ngaih thin anih bakah khawthlirna remchang tak a nih avangin helaia District Park siam chu sawrkarin a ngaipawimawh hle a ni, a ti a. Park siamna tur NEC atanga fund dilna atan Concept Note thehluh a nih tawh thu Meeting-ah hian tarlan a ni a. Meeting chuan Hringlang Tlanga District Park siam hna chu mimal kuta dah lova District Park Committee enkawlna hnuaia dah a nih theih nana hmalak a rel bawk. Hringlang Tlanga District Park tur ram hi Committee-in a hmunah enfiah a tih bakah Champhai District chhunga hmun mawi tak takte chu khualzin hip thei tura chei tha tura hmalak chhunzawm ni se, a ti bawk.

District Park Committee-ah hian District level officer hrang hrang bakah tlawmngaipawlte an tel a. Hringlang Tlang awmna, Mualkawi khawtlang aiawhte an tel bawk.