Vawiin khan Champhai Zote IIDC hmuna Ni 21.4.2017 atanga hnathawk tan Additional District & Session Judge Court lawmna hun, Champhai DC Pu Vanlalngaihsaka hovin DC Conference Hall, Keifang tlangah neih a ni. 

Champhai Bawrhsap Pu Vanlalngaihsaka kaihhruai Additional District & Session Judge Court  neih lawmnaah hian Pu Biakkila, Addl. SP chuan Champhaia District Session Court awm loh avanga Police lam harsatnate tarlangin, hrem tura ngaihte pawh hrem lovin an chhuah phah fo a ni, a ti a, Champhai in hetianga rorelna sang zawk kan nei ta hi Police Dept hnathawh kawngah pawh thil lawmawm tak a ni, a ti a. 

He hunah hian NGO hrang hrang leh Champhai District chhunga Sawrkar Officer-te sawm niin Champhaiin District Session Court a neih hmaa Champhaiin harsatna kawng tam tak a neih thin te tarlan a ni a. Case buaipui tute tan thil buaithlak tak a nih laia Champhaiin Court sang zawka nei ta chu lawmawm an tiin sawkar chungah lawmthu an sawi a.

YMA leh Police Dept. hrang hrang te'n khawtlang venhim hna an thawhnaa ruihhlo tam tak an man thin te Aizawlah kalpui a nih hnuah a result hi hriat hleihtheih a nih thin loh avangin ruihhlo man thenkhat chu YMA ang te a tih ral a lo nih fo tawh laiin tunah chuan Champhai ngeiah ruihhlo leh a zuartu man te chungah rorel a ni ta zel te chu thil lawmawm tak a nih thu, he hunah hian tarlan tel a ni bawk.

He hunah hian Addl. Judge leh Magistrate-te chuan Aizawl hnuaia awm an la nih thu an tarlang a, Aizawl hnuai ni lova, Champhai District hnuai a nih theihna tura hma an lak mek thu an tarlang bawk.