No120/2021-2022

Dated Champhai, the 13th April, 2021: Vawiin khan Champhai District Level Coordination Committee on African Swine Fever (ASF) and other Trans-boundary Animal Diseases (TADs) chu Chairman Pi Maria C.T. Zuali, Bawrhsap hovin DC Conference Hall-ah an thukhawm. He hunah hian tunlai vawk hrileng hlauhawm tak, African Swine Fever (ASF) ni ngeia rinhlelh laka Champhai District a lo him zel theihna tura hmalak dan turte bakah, ramri kaltlanga ran natna inkaichhawn theih hrang hrangte ven dan tur ngaihtuahho a ni.

Pi Maria C.T. Zuali chuan Indo-Myanmar ramri hrula awm Champhai District-ah ramri kaltlanga ran lakluh leh natna kaichhawn tur ven a pawimawh tak meuh thu sawiin, khapna thuchhuah leh vawk engemawzah man a ni chung pawha mahni hamthatna chauh ngaipawimawha dan pawisa lova hma la lui an awm thin chu pawi a tih thu a sawi a. Ran hrileng a awm palh thulha tuar hmasatu tur chu khawtual ran vulhtute an nih avangin kan lo invenlawk a ngaia, ran hrileng laka kan him tlan nan kan zavaia tanhoa zau zawka inzirtirna kalpui a tula, African Swine Fever laka Champhai District himzelna turin kan zavaia beng chhit tlan leh lungrual taka hmalak a ngai a ni, a ti bawk.

Dr. B.Zonghinga, DVO Champhai & Member Secretary, District Level Coordination Committee on African Swine Fever chuan meeting hmasa bawhzui dan report tlangpui a pe a. Ramri hrul khaw hrang hrang tlawhin ramri kana ran lakluh leh a nghawng theihte inzirtirna tum 80 chuang neih a nih tawh thu sawiin, Myanmar nena ramri thui tak intawm Champhai District atanga tunhnaia vawk hrileng African Swine Fever ni ngeia ngaih hmuhchhuah a la ni lo chu lawmawm a tih thu a sawi a, min la luhchilh rih chiah lo mahse ngaihthah mai lova tan mar pat reng erawh kan ngai hle a ni, a ti.

Meeting chuan Champhai District chhunga tun thlenga thawhhona tha tak avanga vawk hrileng thleng lova khuahkhirh a ni chu lawmawm tiin, theihtawp chhuaha tan tlan zel nise a ti a. Vawk hrileng a lo awm palh thulha hmalak dan turte sawiho niin, District Magistrate-in vawk, vawksa leh vawksa atanga siam reng reng phurhkual khapna chhuah chhunzawm zel se, DLAO kaltlangin Village Council tinte hnenah vawk thi awm thulha paih mai lova dan ang taka phumbo a nih theihna tura hmunhma lo thlithlai lawk tura hriattir nise, a nei remchang lo pawhin A.H &Vety. Department-ah hriattir mai nise tih a ni a. ASF chu Sanghal te'n veiin an put darh theih thu pawh tarlan niin, ramsa atanga kaidarh tur ven kawngah theihtawp chhuaha hmalak nise tih a ni bawk. Vawk damlo leh thi awm pawha hriattir vatna tur leh dan pawisa lova vawk lalut leh phurkualte thuneitute hriattir zung zungna tur Phone number; 8974941340, 8794223821, 8414963871, 9862305825 te siam nghal a ni a. Sawrkar thawhpuia dan lova vawk lalut leh phurkual thinte hriattirtute hnenah lawmman siam sak nise tih a ni bawk.

ASF hi boruak atanga inkaichhawn ni loin vawk/sanghal ten taksa indek leh indek lemlo pawhin an kaidarh thei a. Hrikai vawk/sanghal, an sa leh an sa atanga siam ei leh phurh kual mai bakah vawk/sanghal hrikai damlo leh thi atanga tui ril chhuak leh zun-ek vawk/sanghal dangin emaw, mihring leh lirthei veivak ten kaiin an kalna hmunahte an pu darh thei a. Inven nan sawrkar thupekte zawm that leh vawk in leh a vel tihfai leh pawn lam mite luh tir loh a tul thute he hunah hian tarlan a ni.

A.H & Vety. Department Champhai tarlan danin tun dinhmunah Undivided Champhai District chhungah vawk 17,375 vulh mek a ni a. March 2019 atanga vawiin ni thlengin dan lova vawk phurhkual man 122 awm tawhin, PRRS/CSF hrikai hmuhchhuah 61 te chu dan anga tihhlum hnuah phumbo an ni a, 27 te natna dang vangin an thi a, 15 te lilam an ni. Vawiin chawhnu dar khat thleng khan hriat theih chinah vawk hrileng vangin Mizoram pumah vawk thi 694 an awm tawh a ni.

Vawiin meeting-ah hian District Level Committee on African Swine Fever & other Trans-boundary Animal Diseases (TADs) member-te an tel tha hle a ni.

Attachment

  • Loading attachment...