No121/2021-2022
Hnahthial, the 13th April, 2021: Hnahthial District Bawrhsap Pu H.Dolianbuaia kaihhruaiin vawiin khan DC Conference Hall-ah Hnahthial khawchhunga Village Council hrang hrang aiawh te chu thukhawmin khawpui zauh dan tur chungchang leh khawchhung inrelbawlna hrang hrang an sawiho a, Superintendent of Police, Hnahthial Pu Lalbiakkila chuan a hmanpui bawk a ni.
District Bawrhsap Pu H.Dolianbuaia chuan Hnahthial khua chu District khawpui a nih tawh avangin tunhma aiin nasa taka a than chhoh dawn thu sawiin "tun atang hian ruahmanna mumal leh tha neih a ngai a, lane mumal leh zau tha tak neih a ngai a ni" tiin Mi tam takin an ram luah theih chin zawng zawng an luah bakah an Tuizem leh hmanraw thenkhat Vantlang rama an dah thin chu ngaimawhawm a tih thu leh Vantlang hmun hma zah nachang hriat tawk loh vangin Tuihawk kawngbo a tam phah thu leh khawpui chhung a thianghlim loh thin thu a sawi bawk. District khawpui thar indin chho mek Hnahthial chuan mihring pung zel tur thlirin khaw zauhna tur leh lirthei dahna tur hmun ngaih pawimawh a tul thu District bawrhsap chuan sawiin midangte len ve theih lohna tura Veng bil leh khaw bil rilru pu lo turin VC kalkhawmte chu a chah bawk a ni
He hunah hian VC te chuan an huamchhunga khawpui zauhna tur ram awmthei turte tarlang hlawmin District bawrhsap chuan mimal ram neite pass chu April 2021 ral hmain VC-ah thehlut vek turin a ti a, Revenue Deptt te nen tangtlangin a tul anga hmalak zel a nih tur thu a sawi a ni.
Meeting-ah hian Hnahthial khawpui chhungah Sa buk a tling that tlangpui thu tarlan niin Nikum 2020 September-a DC hova pawl hrang hrang ten ruahmanna an lo siam tawh leh Order pawh tih chhuah tawh Vawksa kg1 man Rs.400 tih leh Bawngsa man bithliah te chu tih danglam ala nih loh avangin meeting chuan buk a tling ngei tur a ni, an ti a. Sa talhte endik thin turin Magistrate leh Police te kaihhruaiin ruahmanna siam nghal a ni. Hei bakah hian Cement Mistiri hlawh ni khatah Rs.900 nise, Helper hlawh Rs.450 nise tih rawtna chu hun engemawchen atan pawm phawt nise, hun remchang hmasaah inhlawhfa dangte nen ennawn nise an ti bawk a ni.
Attachment
- Loading attachment...
