327/2022-2023
Champhai, the 28th April, 2022: India ram zalenna kum 75 na tlin lawmna 'Azadi Ka Amrit Mahotsav (AKAM)' denchhenin Mizoram Sawrkar Planning & Programme Implementation Department leh DC Office Champhai-te tangkawpin tukin dar 6:30 khan Champhaiah Marathon intlansiak leh Cycle Rally an buatsaih. Mipui tam zawkte an tel ve theihna tur tinzawna programme siam hi District Bawrhsap Pu James Lalrinchhana chuan telpuiin AKAM Marathon Race cum Cycle Rally-a telte a vailiam a ni.

Hawnna hun tawi Chhangphut Field-a neihah khuallian District Bawrhsap Pu James Lalrinchhana chuan thu sawiin, mipui tel ve theihna tur India zalenna kum 75 na tlin lawmna buatsaih chhoh mek zel ani chu lawmawm tiin, a hlawhtlin theih nana thawkchhuakte fakawm a tih thu a sawi a. Hemi pual hian mahni theuha chakna awmte hmasawn nan leh intuaithar nana hman nise a duh thu sawiin, Azadi Ka Amrit Mahotsav chu India ramin zalenna a hmuh kum 75 tlin puala hmasawnna hrang hrang, scheme leh history tarlan bakah, zalennain mipui hnena chakna a pek hriatrengna leh lawm nana siam a ni, a ti a. Tun kan dinhmun min hlangkaitu zalenna sualtute inpekna theihnghilh lo ila, mipui sawrkar tunnun, hnamzia leh sakhuana humhalh zel kawngah mawhphurhna kan neih vek avangin a chhawmnun leh venhim kawngah theihtawp i chhuah ho zel ang u, tiin kalkhawmte a sawm a ni.

Bawrhsap chuan India ramin hmasawnna rahbi zawha bung thar a kai theihna tur te, keimahni a chakna leh theihna awmte tichaka mahni intodelh thei tur Atmanirbhar Bharat siam tuma theihtawp chhuah mek zel a ni, a ti a. Fit India Movement hnuaia tanlak ngaihnate sawiin, taksa leh thlarau hrisel leh hmantlak nei thei turin insumtheihna leh nunkawng hrisel zawh a tul thu sawiin, Champhai District mipuite chu theihna nasa tak nei an nih avangin ngaihtuahna dik hmanga a tha zawnga rualelna chang hriaa District hmasawn nana thahnemngai taka thawhhopuiah a sawm nghal a ni.

He hun kaihruaitu DSYO Champhai Pu Lalnunfela Chawngthu chuan marathon race leh cycle rally buatsaih chu intihsiakna ai mahin zalenna hlut zia leh India ram hmasawnna leh scheme pawimawhte inhrilhhriatna nipah fawma mipuite telna zalenna kum 75 na tlin lawmna puala buatsaih a ni, a ti a. Kalkhawmte lawmna thu sawiin tlan dan tur a sawifiah nghal a ni.

Tukin Marathon intlansiak leh Cycle Rally a telte hian Chhangphut Field atanga bultanin DC Road lam an pan a, Falkawnah kual chhovin Hospital Road atangin Vengsang kawn thleng an tlan a ni. He hmunah hian kharna hun siam niin, lawmmante sem chhuah a ni.

Marathon intlansiak hi Higher Secondary School leh College zirlai te puala buatsaih a ni a, Girls category-ah Malsawmkimi, 4th Semester BA, Govt. Champhai College chu pakhatna a ni a, Lalrinzuali, 2nd Semester BA, Govt. Champhai College chuan pahnihna dinhmun hauhin Lalhmingmuani, Class XII, Sec A, Govt. Gandhi Memorial Higher Secondary School chu pathumna a ni. Boys category-ah Lalengtluanga, 2nd Semester BA, Govt. Champhai College chu thleng hmasa berin pakhatna a ni a, C.Lalthlamuana, Class XII, Sec C, Govt. Gandhi Memorial Higher Secondary School chu pahnihna niin, Kapzamuana, 4th Semester BA, Govt. Champhai College chuan pathumna dinhmun a hauh bawk. Heng bakah hian Cycle Rally a tel Champhai District Cycling Association hnenah participation prize pek a ni bawk. Lawmman pakhatna hian Rs. 2,000/-, pahnihnain Rs 1,500 leh pathumnain Rs. 1,000/- theuh an dawng a, lawmmante hi DSYO Pu Lalnunfela Chawngthu chuan a hlan a ni.

Tukin Azadi Ka Amrit Mahotsav Marathon Race cum Cycle Rally-ah hian marathon tlan turin Govt. Champhai College zirlai 30, Govt. GM Higher Secondary School zirlai 77, an vaiin mi 107 te an tel thei a. Cycle Rally-ah hian Champhai District Cycling Association member 11 an tel bawk.