328/2022-2023
Kolasib dated 28th April 2022: Vawiin khan Kolasib district-a India zalenna kum 75-na lawmna,’Azadi Ka Amrit Mahotsav in Jan Bhagidari Mode’ kal zel ah DC Office leh Kolasib Florist Association tangkawpin ‘Flower & House Plant Show Competition’ an buaitsaih a. Hemi rual hian ’05 Riders’ ten Kolasib district chhunga Home pathumte tlawh kualin tanpuina an pe bawk a ni.
‘Flower & House Plant Show Competition’ hi DC Circuit House, Kolasib tualzawlah neih niin Pu Lalmuan puia, Settlement Officer-in hun a kaihruai a, Pu John LT Sanga, Deputy Commissioner-in a hawng a ni.

Pu John LT Sanga chuan mihring hmasawn nana zalenna pawimawh zia hriat thar leh nan India zalenna kum 75-na chu Sawrkar department hrang hrang kaltlangin a lawmna buatsaih a nih mek thu a sawi a. Mipui tam zawk tel ve theihna tur ‘Jan Bhagidari’ kalpui mek a nih dan tarlangin mipui rorelna ram, zalenna hnuai a khawsak vanneihthlak zia hre thar a, mahni chenna veng, khua leh ram ti hmingthatu leh ti hmasawntu nih tum theuh turin kalkhawmte a chah bawk a ni.

Vawiin vek hian Pu Lallawmawma, Addl. DC chuan 05 Riders Charity Ride a chhuak mi 21-te chu DC Office kawt atanga vailiamin anni hian ‘Azadi ka Amrit Mahotsav’ lawmna pual hian Enna In Boys Hostel, Thutak Nunpuitu Team (TNT) leh Audrene Scism Children Home-te an tlawh a, tanpuina sum fai cheng 5,000 theuh an hlan a ni.
Flower Show-ah hian mi 17 telin lawmman dawngtu chu:

House Plant :
1st Prize : H. Laltlanmawii
2nd Prize : Lalnunnemi
3rd Prize : Vanlalchhuangi

Flower
1st Prize : R. Vanlalpari
2nd Prize : Lalzarzovi
3rd Prize : Lalnuntluangi