Vawin chawhma dar 10:30 khan All India 20th Livestock Census, District Level Training Champhai District tan District AH & Vety Office ah neih a ni.

He hunah hian Dr. Lalchungnunga Pudaite Deputy Director (Livestock Statistics) chuan thusawiin Ranvulh hi India ram thingtlang lamah chuan eizawnna pawimawh berte zing a mi a ni, a ti a.  India Sawrkar pawhin ranvulh a eizawnna kawngah hian hmasawnna kawng a dap pui zel a, ran chi tha zawk kan vulh theih nan te, hlawk zawk a tharchhuah  nan te leh natna laka kan ran vulhte ven nante scheme pawimawh tak tak a kalpui thin a ni, a ti a. Heng sawrkar scheme-te a hlawhtlin nan chuan ram chhung a kan ranvulh dan leh neih dan hriatchian na Livestock Census hi a pawimawh hle a ni a ti bawk. Enumerators ten tha taka hna an thawh theih nan mipuite pawh theihtawp a tawiawm turin Department chuan a ngen thusawiin Census pawimawhna hre thar leh zual chunga thawkho turin a sawm bawk a ni.

Champhai District DVO Dr.M.Zohmingthangi pawhin thusawiin Livestock Census atana Enumerator tur a thlan VFA kal khawmte chu fimkhur tak leh uluk taka census nei turin a chah a, dawhkana chingfel mai lova a hmun ngei a kal chilh turin a ngen bawk.

He hunah hian Siamthanzauvi Jahau, Inspector of Statistics, chuan Livestock Census neih tura tul leh pawimawhte a zirtir a ni.

Quinquennial Livestock Census hi kum 5 danah India ram pumpuiah neih thin a ni a, in tinah lutin ranvulh zawng zawng chipchiar taka chhiar a ni a. Mizoramah pawh he ran chhiarpui hi hlawhtling taka nei tur hian inbuatsaih a ni a. In tinah luta ran chhiar tur hian Enumerator te khaw chan bik tur ruatfel sak vek anni a, chung enumerator te chuan an khaw chan bik theuh ah Ran chhiarpui hi an nei dawn a ni.

District Headquarters 7 ah training hi nei tawhin Champhai District  hi District Level Training zawhna a ni a. All India 20th Livestock Census, District Level Training-ah hian Directorate AH & Vety, Statistical Cell atangin Dr. Lalchungnunga Pudaite Deputy Director (Livestock Statistics), Siamthanzauvi Jahau, Inspector of Statistics, K. Lalruatkima, Field Assistant of Statistics, C. Vanlalhmangaihi, Field  Assistant of Statistics-te Champhaiah an lokal a ni.