Vawiin chawhnu  khan Champhai District chhunga Agriculture leh Allied Department- te chuan thawhhona leh inpawhtlanna tha zawk a awm theih nan, LAD Picnic Spot, Champhai-ah Meeting an nei. Kumin  thupui thlan ‘Together we’ll build” tih zirhona neih niin nakum thupui atan ‘All for the welfare of Farmer’ tih chu thlan a ni bawk.

He programme hi Pu B. Lalchhuana, District Sericulture Officer in a kaihruaia, Upa K. Thangkhuma HD (Horticulture Department) in hunserh a hman hnuah Department tina Head of Office ten farmers-te an hmalakna leh thawhho a tul zia an sawi a. ATMA kaltlanga Convergence mode a department tinte mawhphurna leh an fund dawnte atanga line department-ten thawhhona tha tak an nei thei thin chu lawmawm an ti hle a ni. Line department tinte chuan an hmalak dan theuhte leh thawhho theihna tur kawng awm te an tarlang a.  Kum 2022- a Doubling of farmer Income tih ti puitling ngei tura thawhho a tulzia uar takin an sawi ho a. An thawhsak kuthnathawktute tana dawr nuam leh rinawm taka thawkho turin an in hlan thar a, a tam thei ang ber field visit neih nise an ti bawk a ni.

Lo neih, Ran vulh, chuktuah huan siam, thlaichin, pangang khawi leh Sangha khawi farmer-te tana department tin in an hmalakna kawngah ATMA chuan KVK nena tangkawpin technology dissemination leh Agricultural Extension hna a thawk a, line department-te nen tangkawpa thawhhopui a tul zia leh an fund hmuh ang angte tangkai leh chak zawka department te nen inrawn tlanga thawhho a tulzia an sawi hlawm a ni. He hunah hian Department mal hian Farmers tan hmasawnna tluantling a thlen lo zia tarlangin beneficiary thlan kawngah te Scheme kalpui danah rualkhai leh inrawn tlanga District level-a thutkhawm leh rorel tlan a pawimawhzia uar takin an sawi hlawm bawk a ni.

Pu C. Lalhriatpuia, Project Director, ATMA-in lawmthu sawina neiin, thawhhona leh inpawh tawnna boruak tha zawk chhawmnun zel a duhthu a sawi a. District Information & Public Relations Deparment, Champhai-in Agriculture leh Allied Department-te hnathawh leh hmalakna programme hrang hrang puan darh leh theh darhna kawnga thataka an thawhpui avangin lawmthu a sawi bawk a ni.

He programme-ah hian Agriculture, ATMA, AH&Veterinary, Horticulture, Sericulture leh Fisheries department atangin Head of Department, Technical Staff leh Staff dangte telin mi 60 an tel thei a ni

Hun hnihna  Pu James Vanlalluaia, DAO, Champhai  kaihhruainain variety programme-te hlim taka hman a nih hnuah zanriah kilho nghal a ni.