Ni hnih awh tur All Mizoram Karate Association (AMKA) Inter District Championship vawi 15-na chu vawiin khan Bethel Community Hall, Champhaiah hawn a ni a. He hunah hian Pi Ethel Rothangpuii, Project Director, DRDA Champhai chu khuallian a ni a, Pu C.Dosavunga, AMKA President, Mizoram chu khualzahawm niin Pu C.Lallianpuia, President, Champhai District Sports Committee (CDSC) chu uaptu a ni.

Khuallian Pi Ethel Rothangpuii chuan AMKA Inter District Championship 2018 hawnna hmang tura sawm ani chu lawmaawm a tih thu a sawi a. Karate  infiamna chu taksa leh rilru hriselna atana pawimawh tak  a ni a, taksa pian hmang dik, rilru fim tak leh ngaihtuahna hrisel tak neih theihna tura pawimawh tak anih thu a sawi a. Karate khelh chuan nun a vawng a, inrintawkna, thuawih theihna leh inthununna a siam thin a ni, a ti a.

Karate zirlai naupangte chu Zirna lama theihtawp chhuah tur leh abik takin tawng dang thiam kawnga tan la turin a chah a, Sap tawng thiamna chuan nakin zela an kel zelna turah a la puih theih dawn thu leh infiamna huangah khawtual mai nilo ram chhung leh khawvel  huap thleng ngaightuahna seng a tul thu a sawi a. Karate thiamte chu thiamna an neihte tihpun kawngah tanla tura fuihin, zirna leh khawtlangah tangkai taka hmang thiam turin a chah nghal bawk a ni.

Khualzahawm Pu C.Dosaavunga pawhin thusawin AMKA Inter District Championship chu District hrang hrangahte a tah tawla neih thin a nih thu a sawi a. Champhai District pawhin a vawi hnihna tur a thleng leh thei chu a lawmpui thu a sawi a. AMKA Silver Jubilee nakuma lawm tur pualin Karate Championship ropui tak huaihawt tum a ni, AMKA President chuan a ti a. Karate chuan ram leh hnam venhimna thuthlung nei kan nih avangin ram leh hnam venhim nan chuan theihtawp kan chhuah zel dawn  a ni, a ti bawk.

He hun Uaptu Pu C.Lallianpuia, President, CDSC chuan AMKA Mizoram-te duhsakna dawnga Champhaiin AMKA Inter District Championship, 2018 a thleng thei chu lawmawm a tih thu a sawi a. Champhai District Sports Committee (CDSC) hnuaiah Soprts Association inziaklut 27 a awm thu leh AMKA Champhai chu hemi hnuaia pawl inziaklut zinga thawhhlawk ber pawl anih thu a sawi a. Karate chu kum 2020, Summer Olympic neih huna a tel ve tawh dawn avangin Zirlaite  pawh lo inpuahchah lawk se a duh thu a sawi a. AMKA Champhai hruaitute leh member-te inpekna fakin District tihmingthaa Medal tamtak an lo hawn thin tawh thu a tarlang bawk a ni.

Vawiin AMKA Inter District Championship vawi 15-na hawnna hun hi Pu Lucas Thangmangliana, President, AMKA Champhai chuan a kaihruai a. Rev. C.Lalrochama, Mizoram Baptish Church-in hunserh a hmang a. Pu C.Lalngura, Chairman, Technical Board, AMKA Champhai-in kalkhawmte lawmna thu a sawi a. AMKA Champhai District hnuaia Karate zirlai ten an thiam thilte a taka entirna hun an entir bawk a ni. Kumin AMKA Inter District Championship, 2018 a tel tur hian Aizawl, Lunglei leh a thlengtu Champhai District atangtein Karate thiamte an pungkhawm a ni.