November ni 28, 2018-a Mizoram MLA Inthlanpui 2018 buatsaiha vote thlak zawh hman a nih loh avanga Election Commission of India (ECI)-in fresh poll buatsaih leh tura a tihna, Lawngtlai District chhunga 36-Tuichawng (ST) Assembly Constituency hnuaia polling station pakhat, 36/35-Ajasora PS-ah vawiin khan tluang taka vote thlak zawh a ni.

36/35-Ajasora PS-ah hian vote nei mipa 543 leh hmeichhia 537, an vaiin mi 1080 an awm a. Tukin zing dar 7 aṭang khan vote thlak ṭan niin, harsatna awm lovin tluang taka vote thlak theih a ni a. A khar hun pangngai tlai dar 4-ah vote thlak hi khar niin, vote 940 a tla a. Mipa 445 leh hmeichhia 495-in vote an thlak a ni.

Lawngtlai District chhunga constituency pathuma polling station 161-ah hian voter 80221 an awm a. Heti hian vote 64841 (81%) a tla ta a, mipa 32582 leh hmeichhia 32259 te'n vote an thlak a ni. Polling station 59 awmna 36-Tuichawng (ST) Assembly Constituency-ah voter 30584 awmin, vote 25969 (85%) a tla a. Polling station 68 awmna 37-Lawngtlai West (ST) Assembly Constituency-ah voter 26124 awmin, vote 21393 (82%) a tla a. Polling station 34 awmna 38-Lawngtlai East (ST) Assembly Constituency-ah voter 23513 awmin, vote 17354 (74%) a tla bawk.

Hei bakah hian tun thlengin Lawngtlai District-a constituency pathumahte hian postal ballot vote 996 a tla tawh a. 36-Tuichawng-ah vote 147, 37-Lawngtlai West-ah vote 331 leh 38-Lawngtlai East-ah vote 518 a tla tawh a ni. Postal ballot vote hi inthlan kaihhnawiha duty, mahni vote neihna polling station-a vote thlak hman lote tan vote chhiar hma thlengin la thlak theih zel a ni.