436/2025-2026
Champhai, 2nd May 2025: Nizan dar 7:00 khan Kahrawt YMA Hall-ah piang leh thi chhinchhiah (Births & Deaths Registration) pawimawhna inhrilhhriatna hun hman a ni. Economics & Statistics bultum Meeting –ah hian Champhai Town chhunga VC, YMA leh RBD ten naupiang leh thi chhinchhiah dana thil pawimawh hrang hrang an sawiho a ni.
Meeting hi Pu H.Lalhmangaiha District Research Officer in a kaihruai a, Directorate of Economics & Statistics atangin Pi B.Vanlalrengi, Dy.Director (CRS) leh Pu J.Ramdinmawia (Inspector of Statistics) ten thu an sawi a. Champhai DC Office atangin Pu H.Lalbiaknia, SDC-in Delayed-a Births & Deaths Certificate dil chungchang a sawifiah bawk.
Piang leh thi-te hi ni 21 chhunga register a nih chuan a free vekin Birth/Death Certificate pek an ni a. Ni 21 hnu lamah chuan late fee chawi a ngai tawh a, chuvangin engmah chawi ngai lova, a hun taka piang leh thi register zel chu sawrkar duhdan a nih thu he hunah hian tarlan a ni.
Birth & Death chungchanga Champhai Town chhunga VC leh YMA ten harsatna an tawh hrang hrang te sawiho a ni a, harsatna awm thei hrang hrangte pawh sawrkar lam hotu ten an hrilhfiahin an zawhna awm ang angte an chhang nghal bawk.
Piang leh thi chhinchhiah hi India khua leh tuite chanvo a nih avangin ramdang mi (Foreigner) te chu piang leh thi chhinchhiah (Register) ve theih an ni lova, Birth & Death Certificate pawh pek theih an nih loh thu inhrilhhriat a ni bawk.
