District Election Office Champhai bultumin vawiin khan Booth Level Officer (BLO) te pualin I&PR Auditorium-ah training buatsaih a ni a. Special Summary Revision of Electoral Roll, 2020 neihna tura pawimawh tak Electors Verification Programme (EVP), Forms pawimawh leh BLO Apps te he hunah hian zirtir an ni.
Training hawngtu Pu Alexander V.Chongthu, Addl DC le ERO Champhai South A/C ni bawk chuan Training tura lokal khawm BLO lo ni tawh leh a tharte lawmna thu a sawi a. Electoral Roll chu inthlan buaipuina kawnga pawimawh hmasa ber a ni a, inthlan felfai leh dik nei turin Electoral Roll felfai tak neih a ngaih avangin hemi buaipuitu BLO te chu an pawimawh hle a ni, a ti a. Electoral Roll siam thar lehnaah pawh BLO te chu uluk leh fimkhur tur a chahin, a hnarkaitu an nih hre thar leh turin a chah bawk a ni. Inthlang ram kan nih angin inthlan apiangin ECI ruahmannain thil thar a awm zel a, zawm thei turin thawktute intuaithar zel angaih thu a sawi a. BLO tharte chu an mamawh leh hriat duhte inthlahrung hauh lova mithiam zawkte zawt zel turin a chah a. ECI in dan leh tihtur a sawite chu namnul mai lova, tihtur a tukte chu felfai takin kan hlenchhuak thin tur a ni, a ti a. BLO kalkhawmte chu training zalen tak, inpawhtlang leh hlawkthlak tak hmang turin duhsakna a hlan a ni.
Pu Lalnunfela Chawngthu, Election Officer pawhin thusawiin, Election-ah thiam tawh tih a awm theih loh thu leh ECI in thil thar a siam thin avangin engtiklai pawha intuaihriam reng a ngaih thu a sawi a. BLO awmsa leh a bik takin a thar ten uluk taka training an neih a tul a ni, a ti a. Special Summary Revision of Electoral Roll, 2020 atana thil thar ECI in September Ni 1, 2019 a a tlangzarh tak Electors Verification Programme chungchang a sawifiah a. ECI pawmpui document-te hmangin Roll Bu a hming, nihna leh hriat ngai dangte a endik theih a, Vote nei thar luhna, paih ngai paih leh siamthat ngaite chenin a tihtheih a ni, a ti a. EVP ti tur ten mahni remchanna ang zelin, document kengin Community Service Centre a pan theih thu leh hemi tur hian CSC te pawh training pek an nih tawh thu a sawi a. Mahni awm hmun atangin Mobile Apps leh NVSP.in Portal-ah te leh ERO/AERO Office-ah te EVP tih theih a ni, a ti a. Election Officer chuan BLO te pawhin House to House verification BLO Apps hmangin an tih angaih dawn thu leh Polling Station verification, In zawng zawng Geo tagging an tih a ngaih dawn thu a sawi bawk.
Vawiin training-ah hian Master Trainer ten zirtirna an pe a. Pi Rebecca Laldinmawii Hrahsel, AERO 23-Champhai North A/C-in Roll Revision chungchang leh Form pawimawhte a sawifiah a. Pu Benjamin Zalawma Ralte, AERO 24-Champhai South A/C in BLO Apps awmzia leh hman dan a sawifiah bawk a ni. Vawiin BLO Training-ah hian 23-Champhai North A/C, 24-Champhai South A/C huamchhunga BLO theuhte leh 25-East Tuipui A/C huamchhunga khaw thenkhata BLO te an tel a ni.
