Vawiin khan Lawngtlai Chief Medical Officer (CMO) Conference Hall-ah kumin October thla atanga Mizorama Health Care Scheme hman tur chi hnih - Ayushman Bharat Pradhan Mantri Jan Arogya Yojana (AB-PMJAY) leh Mizoram State Health Care Scheme (MSHCS) te chungchang zir hona buatsaih a ni.

He hunah hian Medical lama thawktu te, health worker leh accredited social health activist (ASHA) te, khawtlang hruaitute leh tlawmngai pawl ai awhte an tel a. Lawngtlai CMO office atangin Pi MC Zomawii'n hun a kaihruai a. Mizoram State Health Care Society-a Medical Officer Dr K. Vanduhtlinga'n zirtirna pein, zawhna leh chhanna leh sawi hona hun hman chhunzawm nghal a ni a. Lawngtlai District MSHCS Coordinator Pu Thanghnuna Bawitlung chuan lawm thu sawiin, training hi khar a ni.

He'ng health care scheme pahnih te hi October ni 1, 2019 atangin Mizoramah hman tan a ni dawn a. AB-PMJAY hi sawrkar laipui Rural Development Ministry-in Socio Economic Caste Census (SECC) 2011 a buatsaiha khawsak harsa leh hnuaihnung a tih (deprived list-a tel) chhungkuate leh kum 2018-a Rashtriya Swasthya Bima Yojana (RSBY) hnuaia thla laa Smart Card neite'n an hmang thei dawn a, Golden Card siamin, chhungkaw khatin kum khatah Rs 5,00,000/- (nuainga) thleng damdawia inenkawlna senso an bill thei ang. MSHCS-ah thung hi chuan AB-PMJAY hmang thei lo - Below Poverty Line (BPL), Above Poverty Line (APL) leh sawrkar hna thawkte'n sawrkara an bill-sak theih loh chhungkaw member zawng zawng an inziak lut thei ang a, chhungkaw khatin kum khatah damdawia inenkawlna senso Rs 2,00,000/- (nuaihnih) thleng an bill thei thung dawn a ni.

AB-PMJAY hnuaia Golden Card hi sawrkar damdawi inahte siam lawk theih reng a ni a, damdawi ina in-admit dawn paw'n siam chawp theih a ni. SECC leh 2018-a RSBY Smart Card nei Golden Card siam tawhte chuan an Golden Card neih sa chu kum 2021 thleng an hmang zui thei bawk ang. MSHCS-a inziah luh nan chuan thla thum (September - October, 2019) chhung hun hawn a ni a, inziah luh man hi BPL chhungkaw tan Rs 100/- niin, APL chhungkaw tan Rs 1,000/- a ni thung.