Vawiin khan Social Welfare Department buatsaih ni 5 chhung awh tur ‘Orientation Course on Relapse Prevention and Management’ chu HPC Vice Chairman Pu Lawmawma Tochhawng chuan Chhawmdawlna In, Melte ah a hawng. Training hi ruihhlo ngaite enkawlnaa thawktute intuaihriamna atana buatsaih niin Mizoram hmun hrang hranga De-addiction Centre leh Home a thawk mi 30 chuang an kalkhawm a ni.

Hawnna inkhawm Pi Vanlalhruaii, Mizoram Social Defence & Rehabilitation Board (MSD&RB) kaihhruaiah Pu Lawmawma Tochhawng chuan thu sawiin training tura kalkhawm, ruihhlo ngaite tanpuina kawnga hnathawktute chu a ngaihsan takzet thu leh an hnathawh chu hna zahawm berte zinga mi anih thu a sawi a. Mi beidawngte enkawltu an nih avangin an tan beidawn a thiang ve lo a ni tiin kalkhawmte chu lainatna, chhelna, huaisenna leh dawhtheihna nen an hna thawk thin turin a chah a ni. Mizoramin hmasawnna eng ang pawh nei mah ila, sum leh pai dinhmun pawh sang zel mah se kan thalaite ruihhlo bawiha an tan zel chuan heng hmasawnna te hian awmzia a nei dawnlo a ni tiin ruihhlo leh sualna dang vanga harsatna tawkte chhanchhuah kawngah Sawrkar mai bakah mimal, kohhran leh NGO-ten an theihtawp chhuahin thahnemngai takin hma an la chu an fakawm takzet a ni, a ti bawk. Training tura kalkhawm leh anmahni zirtirtu resource person –te duhsakna hlanin ruihhlo do kawnga hmalak zel dan tur sawiho tur leh sawrkar hnenah thurawn te pe turin a sawm a ni.

Hawnna inkhawm-ah hian Pi Hrangthanmawii Vanphong, WADA in hunserh hmangin Dr RL Sanghluna, SMO Synod Hospital-in thusawina hun a hmanga. Pi F. Lalngaihawmi, DSWO Lunglein chuan lawmthu sawina hun a hmang bawk.

‘Orientation Course on Relapse Prevention and Management’ hi ni 5 chhung awh tur niin Chhawmdawlna In Hall, Melte-ah vawiin khan tan nghal a ni a. Training naah hian Dr RL Sanghluna,Pi  Camelia Lalhruaitluangi, Pu David J. Lalfakzuala, Pi Lalthanmawii Vanphong leh Pi Lalnunzami Chawngthu te Resource person niin zirtirna an pe dawn a ni.