No.2578/2021-2022

Aizawl 12th October, 2021: Sawrkar laipui Ministry of Jal Shakti kaltlanga van ruahtui tla khawlkhawm leh dahthat kawnga hmalakna Catch the Rain Campaign thawh hnihna Champhaia kalpui tur chu vawiin khan Pu C.Lalhmachhuana, SE, PHED Champhai WATSAN Circle chuan SE Pisa, New Champhaiah a hawng. He hunah hian NYK District Youth Officer Pu Dinesh Jangid leh SDO PHED Champhai Project Sub-Division Pu Vanlalmuanawma te pawh an tel a ni.

Pu C.Lalhmachhuana chuan khawvel sik leh sa inthlak chho zelah tui harsatna a zual zel thu sawiin, kan tu leh fate hmakhua ngaiin tunah kan penchhuah a ngai a ni, a ti a. NYK Champhaiin Catch the Rain Campaign a kalpui tur chu fakawm tiin, Department-in a tawiawm zel dawn thu a sawi a ni.

NYK District Youth Officer Pu Dinesh Jangid chuan ruahtui khawlkhawm leh tangkai dan inzirtirnate phak tawka kalpui zel tum a nih thu sawiin, hemi kawnga tawiawm turin a kaihhnawih zawng zawngte a sawm nghal a ni.

Ruahtui tlaa thui tak innghat Mizoramah sik leh sa danglam chak tak avangin tui harsatna a awm thuai thei a. Ruahtui khawlkhawm leh vawnhim kawnga tanlak a tul zual hle a ni. NYK leh PHE Department tangkawp chuan mipui zirtir kawngah hma a la zel dawn a ni.