No.2577/2021-2022
Aizawl, 12th October, 2021: Vawiin khan NIC, DC Office Champhaiah District chhunga Central sawrkar sum hmanga hmasawnna hnathawh programme hrang hrangte enzuitu District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, MP (Lok Sabha) leh Co-Chairman Pu K.Vanlalvena, MP (Rajya Sabha) hovin Virtual meeting neiin an thukhawm a, Sawrkar laipui Scheme kalpui dan hrang hrangte thlirho a ni.

Pu C.Lalrosanga chuan hrileng avanga virtual meeting hmanga DISHA neih a tul tak thu sawiin, hrileng kara meeting hun tha neih a ni leh, official leh member-te kokim taka an tel thei chu lawmawm a tih thu a sawi a. Sawrkar laipui scheme thlirletna hun hman chuan thawhhona tha zawk leh hnathawhte inhriatpuitawnna a thlen thu a sawi a. DISHA thutkhawm chuan langtlang taka hna kalpui leh hmalak ngaihnate inhrilhhriatna leh thawhhona tha thlen se a duh thu tarlangin, line department-te convergence anga thawhho a tul pawha inpawh taka hma la tlang turin a chah a. Sawrkar laipui scheme pawimawh tak tak thawktu Department hrang hrangte chu hunbi tuk chhung ngeia an hnathawhte zo hman tum tura chahin, an rawngbawlsak mipuite tana theihtawp chhuah turin a fuih nghal a ni.

Meeting-a tarlan a nih dan chuan DRDA Champhai hmalakna MGNREGA hnuaiah kum 2021-2022 financial year kal mek September thla thlengin Job Card holder 17,503 te hnenah ni 61 inhlawhna siam a ni a. April 2017 atanga kalpui tan Pradhan Mantri Awaas Yojana-Gramin, PMAY-G (Rural Housing Scheme) hnuaia beneficiary mi 165 te hnenah insak tanpuina pek niin, In 146 te chu sak zawh tawh niin, 19 dangte sak zawh a la ni lo a ni. District chhunga Pradhan Mantri Krishi Sinchayee Yojana (PMKSY) pasarih kalpui zinga 1 thawh mek chu zawhfel tep tawh a ni a, 2 zawhfel tawh a ni a, 4 dangte tawpsan rih a ni.

PHE Department hmalakna Jal Jeevan Mission (JMM) hmangin District chhunga khaw 7 ah Water Supply Scheme kalpui mek a ni a. PWD hnuaiah Pradhan Mantri Gram Sadak Yojana (PMGSY) kawng 21, km 289.19 a thui siam tur atanga kawng 16, km 229.17 chu zawhfel tawh a ni a. Meeting chuan nakum March 2022 a PMGSY hna kal laite a thawh hun a tawp tawh dawn a avangin chak zawka thawh a nih theih nan hmalak ni se a ti a. Pradhan Mantri Krishi Sinchayee Yojana (PMKSY) ‘Har Khet Ko Pani’ tih scheme 2016 atanga kalpui tawh hmangin Minor Irrigation Project 5 kalpui mek a nih bakah a vawikhatna turin Ground Water Irrigation Scheme kaltlangin leihnuai verh hmanga tuilakna tur project 4 kalpui mek a ni bawk.

AH & Vety. Department-in FOCUS kaltlangin project 4 an thawk mek a, khaw 8 ah Sial vulhna in leh tul dangte siam zawh a ni a. Vawk kahrai kalpui turin Boar Semen Station sak niin thawktute pawh lak an ni tawh bawk. Fisheries Department hnuaia Blue Revolution Scheme hnuaiah beneficiary 20 an awm a, project thawh zawh tawh a ni. RKVY hnuaiah Sericulture Department-in pangang khawina in thuamthatna tur tanpuina mi 25 te hnenah a pe a. Theihmu huan enkawlna tur tanpuina mi 15 te pek an ni bawk.

National Health Mission hnuaiah January-September 2021 chhungin naupiang 979 an awm a, nausen thi 16 awmin Infant Mortality Rate (IMR) chu 16.6 a ni a. Nu nau chunga thi 1 awmin Maternal Mortality Rate (MMR) chu 103.6 a ni. Mobile Medical Camp tum 8 neih niin damlo 289 endik an ni a. Mi nawlpuiah HIV test tihsak mi 2851 awmin 78 (2.74%) an positive a. Raipuar mi 2690 test zinga 13 (0.48%) an positive bawk a. HIV positive zingah kum 25-34 inkar an tam ber a ni. ART Centre-a inziaklut mi 2080 awmin OST Centre-a inziaklut mi 1109 an awm bawk.

Vector Borne Disease Control Programme kaltlangin malaria case 9 hmuh niin 1 in a thihpui a. TB rinhlelh test mi 295 zinga 27 te chuan TB an vei a, Multi-Drug Resistance TB rinhlelh 32 test zinga mi 3 te chuan an vei tih finfiah a ni bawk. National Tobacco Control Programme (NTCP) hnuaiah Nicotine Replacement Therapy la mi 128 zingah vaihlo leh a kaihhnawih bansan za zela 3.75 an awm bawk a ni.

Champhai District-ah AAY Ration Card nei chhungkua 1855, PHH 8741 leh Non-NFSA 6801 an awm mek a, PMGKAY (AAY leh PHH te tana mi pakhat zelin buhfai kg 5 a thlawna an dawn thin) kaltlangin May - September 2021 thlengin buhfai kg 11825.65 sem chhuah a ni. National Social Assistance Programme (NSAP) hnuaiah tar chawmna/ tar pension mi 1337, hmeithai pension mi 153 leh disabled pension rualbanlo mi 37 te pek mek niin, Ministry of Tribal Affairs kaltlangin Zote-ah Observation Home leh Travellers' Inn Farkawn-ah sak mek a ni. Champhai District chhunga mobile service leh internet network tha zawk a awm theih nana hmalak leh, Centrally Sponsored Scheme-te print leh electronic media kaltlanga mipuite hnena zau zawka puanzar a nih theih nan chak zawka hmalak ni se tih a ni bawk.

Heng bakah hian CSS hnuaia hnathawh hrang hrangte sawiho a zirchian a ni bawk.

Virtual meeting hmanga DISHA thutkhawmah hian Champhai District chhunga Assembly Constituency 3 MLA; Pu T.J. Lalnuntluanga MLA, Champhai South A/C, Pu Ramthanmawia MLA, East Tuipui A/C, Dr. Z.R Thiamsanga MLA, Champhai North A/C, Pu Henry C.Lalrawnkima, Addl. DC, Pu R.Lalnghakliana PD, DRDA leh CSS khawih Department hrang hrang hotute, DISHA Member dangte leh sawm bikte an tel a ni.