No.2576/2021-2022
Aizawl dated 12th October 2021: Vawiin chawhma khan Dr.H.Lalthlangliana, District Election Officer, Kolasib district chuan 4-Tuirial (ST) Bye Election nei tur a inbuatsaihna kalpui dan chungchangah thutharlakhawmtute a kawm a, inthlanna felfai buatsaih a nih rualin hrileng lak a vote thlaktute leh official-te an himna turin ruahmanna siam a tul thu a sawi.

Dr.H.Lalthlangliana chuan 4-Tuirial (ST) AC Bye Election neih tur ah hian mi pali in inthlanna chuh tur a hming an pek thu leh a tul ang angte endik a nih tawh thu sawiin naktuk chawhnu dar 3 thleng inhnuhdawhna hun hawn a nih thu a sawi a. Kolasib district-a Covid-19 hri inkai chhawn dawn pawh a tlakhniam mek thu tarlangin Political party hrang hrangte pawhin hri len lai a nih angin vote an zawnnahte pawh SOP dinglai zawm chunga fimkhur tak a campaign hna an kalpui a pawimawh thu a sawi bawk a ni.

Public meeting-a mi awm thei zat ngaih pawimawhte, House to house campaign chungchanga zawm turte leh Social distancing ngai pawimawh turin Political party tin te a ngen a, Public Meeting buatsaih a nih chuan Mizoram People’s Forum-te hriattir zel tur a nih thu a sawi bawk a ni. Vote thlak tawp hun atanga chhiar let a darkar 48 thleng campaign hun hawn ni thin chu darkar 72 a pawh sei a nih tak avangin Political party tin te tan campaign hun a tawi phah thu sawiin Public meeting hun chhung hi zan dar 6 leh zing dar 9 inkarah kalpui loh tur a nih thu a sawi bawk a ni.

Dr.H.Lalthlangliana chuan inthlan niah a pangai a vote thlak hun chu tlai dar 5 thleng a ruahman a nih thu leh dar 5:00 PM – 6:00 PM inkar chu Sabbath serhte leh hri kai vote thlak duhte tan a ruahman a nih thu a sawi a, Polling Station tin ah Covid-19 Nodal Officer dah vek a nih tur thu a sawi bawk a ni.

DEO hian thutharlakhawmtute a kawm zawh hian General Observer Mohammed Ali Shihab, IAS hovin Counting Hall leh Strong Room inbuatsaih dan a hmun ah an endik nghal bawk a ni.

Attachment

  • Loading attachment...