No.2575/2021-2022
Aizawl, 12th October, 2021 : United Way of Bengaluru(UWBe)ten CSR kaltlanga Covid 19 dona hmanrua, BiPAP ventilator 88 leh consumables 176 Mizoram tana an rawn pek chu State leh District hospital hrang hrangah te an mamawh mila sem turin vawiin khan State Planning Board Vice Chairman Pu H.Rammawi chuan Health & FamilyWelfare Department kutah a hlan a. H&FW Department aiawhin P&PI Committee Room-ah Pu F.Lianhlira Principal Director, H&FW Department in a dawng a ni.

Pu H.Rammawi chuan Mizoram chu Covid 19 dona kawngah ‘hnam anga tangrual ber kan ni ang’ tiin hemi kawnga LLTF te inpekna chu ropui a tihzia a sawi a. Hripui avanga Mizoramin harsatna lian tak a tawh lai mekin Myanmar atanga raltlan te chhawmdawlna leh enkawlna tur pawh ngaihtuah a ngai bawk a. Planning & Programme Implementation Department leh State Planning Board Vice Chairman a nihna anga Central sawrkar leh ramdang atanga tanpuina awm thei te an dap kual nasat thu leh tun dinhmunah chuan H&FW Department chu an pawimawh zia sawiin hripui dona tura hmalakna bakah National Digital Health Card Programme pawh Mizorama kalpui a nih ve thuai theih nan chak zawka hma la turin a fuih a ni.

Hmanraw inhlanna hun hi Dr.Lalrinchhana Principal Adviser, Planning & Programme Implementation Department & CSR Nodal Officer for Mizoram in a kaihruai a. Pu F.Lianhlira, Principal Director, H&FW Department pawhin thu sawiin Mizorama Covid 19 hripui lo luh tan dan leh a darh dan te, hripui dona kawnga Department hmalakna hrang hrang te nen a sawi a. UWBe atanga Covid dona hmanrua thahnem tak Mizoramin a dawng chu lawmawm a tiin hemi atana theihtawp chhuaha hma latu Dr.Lalrinchhana, leh, Pu Kulothungan IAS, Deputy Commissioner, Lunglei District te chungah lawmthu a sawi a ni.