No.173/2021-2022 

Dated Champhai, the 17th April, 2021: Vawiin khan District Rural Development Agency (DRDA) Champhai buatsaihin tuihna humhalh leh kan tui tlante a lo thianghlim zawkna tur atana hmalakna Jal Shakti Abhiyan 'Catch The Rain' Campaign kaltlang Rally thawhkhatna chu Tuipuihnar-ah Bawrhsap Pi Maria C.T Zuali, Chairman, District Water and Sanitation Committee hova neih a ni.

Kalkhawmte hmaah thusawiin Bawrhsap Pi Maria C.T. Zuali chuan Mizoramin tun thlenga ruahtui tla kan la dawng thin chu vanneihthlak hle a a hriat thu sawiin, phairamte aiin ruahtui tla kan dawn danah vannei zawk angin lang rih mah ila  tuihna leh ram ngaw humhalh kawngah tan kan lak loh chuan nakin lawkah chuan ruahtui dawn tur pawh kan la nei lo mai thei a ni, a ti a.  Rual u deuh ten Champhai tui tlan ber Tuipui tuihna that thin thu an sawi chu hmuh theiha a kiam chak hle thu sawiin, sawrkar laipui duan tuihna humhalh kawnga hmalakna Jal Shakti Abhyan hnuaia 'Catch the Rain' Rally  khuhhawnna chu Tuipui tui  kiam chak zia hre tura a hnara kalchilha  buatsaih a ni, a ti a. Phai ram aiin ruahtui dawn leh tui hna neihah vannei zawk angin lang mah ila kum 20 hnuah chuan hetiang reng hi a nih tawh dawn loh avangin tu leh fa ten min dem lohna turin tuihna humhalh leh ruahtui khawl kawngah kan pen chhuah tak tak a hun tawh a ni, a ti bawk.

Chairman, District Water and Sanitation Committee ni bawk chuan tui mamawhna avangin leihnuai tui lakna leilet phaizawlahte siam chhoh mek ni bawk mahse mi nazawngin kan tih theih loh a ni a,
tui chu a tel lova kan awm theih loh leh a thlakna la awm lo a nih avangin humhalh kawngah puanven sawi chhinga theihtawp chhuaha tan angaia, tui tlan hnar tibawlhhlawh theite thianfai zelin zirtirna kan kalpui a tul dawn a ni, a ti a. Rally neih chuan kalkhawmte mit leh thinlungah tui tlan hnar tihfai tulzia leh ruahtui khawl nachang hriat kawngah chak zawka hmalak a tulzia tuh ngei se a duh thu a sawi bawk.

He hun kaihruaitu Pu R.Lalnghakliana, PD DRDA Champhai chuan tuihna kiam zel leh tui harsatna nasa tak awm chho chu sawrkar laipuiin a vei thu leh hemi kawnga hmalakna turin Ministry of Rural Development pawhin Jal Shakti Abhyan hnuaiah ruahtui tla dahkhawl leh tui hna humhalh kawnga hmalakna Catch the Rain Campaign a kalpui thu a sawi a. Kumin March Ni 22 atanga November 30 thlenga kalpui tum a nih thu leh April-May thla chhoah inzirtirna Awareness Campaign neih tuma ruahmanna siam a nih thu sawiin, Champhai District-a Catch the Rain Campaign kalpui dan tur tlangpui a tarlang bawk.

Catch the Rain Rally thawhkhatna khuhhawnna program tawi buatsaih zawh hnu hian Tuipui hnar dung tluan ke a zawh chhoh niin, tuihna humhalh kawnga hmalak ngai hrang hrangte enfiah a ni a. Tui dahkhawl theih dan turte, hnâwl dang tur check dam siam dan tur leh bawlhhlawh paihna tur ni lova paih thin avanga lui kawr bawlhhlawh chak ziate leh mipuite inzirthar tul ziate a hmun ngeiah kala enfiah a ni.

Ruahman dan chuan Catch the Rain Awareness Campaign hnuaiah hian April thla leh May thla chawhma thlengin Rally, Seminar, Workshop leh hnatlangte neih thin a ni dawn a ni.

Bawrhsap hian vawiin vek khan Tuipuihnar Khankawn-Zotlang inkara leivung paih avanga harsatna awm theite leh Tuipui kama awm ran talhna in sakte a hmunah kalin Official leh khawtlang hruaitute nen an enfiah bawk a ni.

Vawiin Catch the Rain Rally-ah hian sawrkar department hrang hrang hotute, Champhai South bial chhung VC leh NGO hotute, Rural Development hnuaia thawktute leh Chanchinbumite an tel a ni.