24/2026-2027

Dated Champhai, 2nd April 2026: Vawiin chawhnu dar 1 khan Kum 2027 Chhiarpui kalpui tan mekah vawiin khan Champhai District Bawrhsap Pu Mohammad Aaquib chuan DC Chamber-ah chanchinbumite briefing a neihpui.

He hunah hian Bawrhsap Pu Mohammad Aaquib chuan chanchinbumite chu chibai bukin Press Briefing a an kal thei chu lawmawm a tih thu a sawi a, Kum 2027 Chhiarpui kalpui dan tur leh kalphung tur hrang hrang a tarlang a, digital veka kalpui tur a nih avangin Enumerator te'n in tin tlawhchhuakin Mobile phone hmangin chhiarpui hi kalpui a nih tur thu a tarlang a, chhiarpui atan Enumerator leh Supervisor 201 an awm a, anmahni bialtu Nodal Officer te kaihhruainain training pek an nih tur thu a tarlang bawk. Bawrhsap chuan he chhiarpui neih mekah hian Champhai District mipuite inziaklut vek tur leh chhiarpui kaihhnawiha thawktute tha taka lo thawhpui turin a ngen a ni.

Kum 2027 chhiarpui hi April ni 1, 2026 atangin kalpui tan a ni a, tun tum chhiarpui hi India rama chhiarpui vawi 16 neihna a ni. Chhiarpui hi Cencus Act. 1948 leh Census Rules 1990 behchhanin neih thin a ni a, kum 2011 kha chhiarpui neih hnuhnungber a ni a, chhiarpui 2027 hi chhiarpui vawi 16-na a nih rualin India ramin zalenna a hmuh hnua chhiarpui neih tum 8-na tur a ni bawk.

Chhiarpui hi thawh hniha kalpui tur a ni a, a thawhkhatna hi House Listing & Housing Census, HLO tia sawi bawk niin kum 2026, April ni 1 atangin kalpui tan a ni a, a thawh khatna hian September 2026 thleng a awh dawn a ni . HLO kalpui hma hian ni 15 chhung mahni inziahluhna hun hawn zel a ni dawn a, hemi hun chhung hian chhungkaw tin atanga chhungkaw aiawh zo tur mi pakhat phone hmangin alo inziahluh theih a, zawhna chhan tur leh dahkhat tur awm te a theih ang ang mahnia lo tih lawk theih a ni. A thawhhnihna Population Enumaration hi February 2027 atangin tan leh a ni dawn a, hemi hun chhung hian mimal tinte chanchin – zirna, chenna, fa neih zat leh thil dang dangte lakkhawm a ni ang a, a hun tur leh chanchin lakkhawm turte hi chiang zawka inhriattir leh a ni ang.

Champhai District ah hian bial pali - Champhai Urban, Champhai Rural, Khawbung leh Farkawnah te then a ni a, bial tin vil tur hian Nodal Officer ruat vek an ni bawk.