3649/2022-2023
Champhai, the 21st February, 2023: Chapchar Kût, 2023 lawm tura inpuahchahna kalpui mek zelah Champhai District Chapchar Kût Organizing Committee chu vawiin chawhnu dar 1 khan an Chairman Pu James Lalrinchhana, District Bawrhsap hovin DC Conference Hall-ah hmalak tawhna leh hmachhawpte sawihoin an thu khawm.

Bawrhsap Pu James Lalrinchhana chuan pipute sulhnu nundan tha leh zonun zemawite chhawmnun zel a pawimawh thu sawiin, Chapchar Kût lo thleng tur chu pipute ziarang phawk chhuak thei ang ber leh hlim tlang thei ang bera lawm tum a nih thu a sawi a. Chapchar Kût chuan mimal leh khawtlangah inpawhna nasa zawk a thlen ngei a beisei thu a sawi a. Hmalak tawhna hrang hrang tarlante lawmawm a tih thu sawiin, hlawhtling taka Chapchar Kût lawm a nih theih nan chanvo leh mawhphurhna hrang hrang neite chu theihtawp chhuah theuh turin a sawm a ni.

Mizo hnam tana Kût pawimawh tak, Chapchar Kût lawmna chu Champhaiah mipui huapzo leh ropui taka buatsaih tum niin inpuahchahna kalpui chhoh mek zel a ni a. Chapchar Kût hi March ni 3, 2023 Zirtawpni chawhma dar 10:30 atangin Zotlang Sports Stadium, Champhaiah neih tum a ni a. Health & Family Welfare Board Vice Chairman Dr. ZR Thiamsanga, Champhai North bialtu MLA chuan Kût Pa niin he hun hi a hmanpui dawn a; District Bawrhsap Pu James Lalrinchhana chu Kût thlengtu tur a ni ang.

He hunah hian hlawhtling taka Kût hman a nih theih nana Sub-Commitee pawimawh hrang hrang dinte atangin an hmalak tawh dante ngaihthlak a ni a, senso tul angte pawh pharh niin sawiho a ni a. Hmunhma buatsaih leh tul dangte pawh sawiho a ni bawk a. Chapchar Kût lawmna kaltlang hian Zofate inpumkhatna leh hnam ziarang lam hawi a tam thei ang ber lantir tura ruahmanna siam nise tih a ni a. Ruahman dan chuan Kût ni hian Mizo hnam lam hrang hrang leh infiamnate, malzai mawi tak takte bakah Chapchar Kût pual live concert-te buatsaih tum a ni a. Chapchar Kût lawmna program hi mipuiten TV kaltlanga an thlir theih turin Local Cable TV 2, CCN leh LCN ahte live telecast-a pekchhuah tum a ni a. A hmunah hian mipuite tana awlsam zawk nan ei leh in lam mai theihna tur Food Stall 6 siam a ni dawn bawk a ni.

Chapchar Kût-ah hian Mizo ziarang lang tam thei ang bera inchei turin Chapchar Kût Organizing Committee chuan mipuite a ngen a. Chapchar Kût pual hian hnam ziarang pholang thei tur Stall siam tura hmalak a ni a. Kût chhimtu naupang zingah hnam thuama inchei nalh thlan a nih dawn bakah Chapchar Kût Miss leh Mister thlan a ni dawn bawk a. Chapchar Kût hlawhtlin zawk nan Sawrkar hnathawk leh mipuite chu a tam thei ang ber Chapchar Kût chhim turin Chapchar Kût Organizing Committee chuan a sawm a ni.