Sawrkar laipuia Ministry of Textiles hnuaia Research Extension Centre, Central Silk Board (CSB) leh District Sericulture Office, Champhai tangkawp buatsaih Pangang khawitute tana training ‘Chawki Rearing Training’ chu vawiin khan Govt. Mulberry Seed Farm, Champhai Kanan Vengah neih tan a ni. Training thupui thlan ‘Good Handling gives best Harvest’ (Uluk leh tha taka sawngbawl chuan rah tha tak a chhuah thin a ni) tih hian March ni 23 atanga April ni 7 thleng a awh dawn a ni. Chawki awmzia tak chu Maimaw pangang a tuikeu atanga vawihnih / vawithum an inlip thleng hi niin Chawki uluk bika enkawl hi Cocoon quality tha leh tam zawk thar chhuah   kawngah a innghat thui hle a ni.

Pu B.Lalchhuana District Sericulture Officer (DSO) chuan kum kalta chhunga Champhai District-a Cocoon thar chhuah zat chu Metrict ton 12 a nih thu leh kum tharah chuan a let a tam thar chhuak thei tura hmalak a nih thu a sawi a. India ram chu China dawta khawvela silk thar chhuak hnem ber  anih rualin a chawlut hnem ber ram a ni leh lawi si a; hei hian kan la intodelh loh zia a tilang a ni, a ti a. Ministry of Textiles hnuaia Central Silk Board (CSB) hmalakna hmanga Pangang khawitute tana Training buatsaih ani chu lawmawm a tih thu sawiin, training chu India sawrkar in tum nei rana  Silk thar chhuah kawnga China hmakhalh a tumna programme chikhat anih avangin ngaipawimawh leh zual turin kalkhawmte chu a sawm a. North East Region Textile Promotion Scheme hnuaiah hmeichhiate tan pangang khawia eizawnna  siam niin an mawmawh hmanraw hrang hrangte pawh pek mek zel a ni, a ti a. Kum 2013 atanga kalpui kum thum awh tur scheme hnuaiah hian Silk dehchhuah kawngah nasa taka hmalak anih thu a sawi a. Cocoon quality tha zawk tharchhuah kawnga tan lak angaih thu leh a hralh chhuahna market lama harsatna awm lo anih avangin a kawng a eng hle thu a sawi a. Training chhim tura lokalte chu rilru leh tiktak zeta training nei a, thiamthil an zir chuahte midang tana tangkai zawka hmang thei turin a chah bawk a ni.

He hunah hian CSB lam atanga lokal Resource Person Pu Vanlaldinga chuan training neih dan turte sawifiahna a nei a. Mizoram hmun hrang hrangah hlawhtling taka training an lo buatsaih thin tawh thu a sawi a. Cocoon quality tha leh tam zawk thar chhuah a pawimawh thu sawiin pangang khawia eizawnna chu tihlar leh zual an tum thu a sawi a. Circle Incharge-ten an bial chhunga pangang khawitute uluk taka an vil angaih thu a sawi bawk a ni.

Training hawnna programme hi Pi K.Lallawmzuali, Sericulture Extension Officer (SEO) in kaihruaiiin kalkhawmte lawmna thu a sawi a. Dr Lallawmkima DIPRO, Champhai pawhin training chhimtute fuihna thu a sawi bawk a ni.

Central Silk Board (CSB) hnuaia Intensive Bivoltine Sericulture Development Project (IBSDP) kaltlangin Champhai District-ah chhungkaw 600 thlan niin chhungtin ten Thingtheihmu huan Tin chanve theuh an enkawl a. Chawki rearing (Chawki khawi) in a tum ber chu Pangang khawi tura thlan chhuahte khawi tur mawimaw chu  a Chawki hun chhung  training chhuak, a thiam bik ten an vulh sak anga, chu chu pangang vulhtu ten leisakin chawlhkar hnih chhungin Cocoon quality tha tak thar chhuak thei turin an khawi tawh dawn a ni.

Training tur hian Champhai District chhunga khaw hrang hrang Vaphai, Lianpui, Pawlrang, Hliappui, Khawhai, Sialhawk , Khawzawl leh Champhai khawchhung atangin mi 14 an tel a. Zirtirna hi Central Silk Board (CSB) lam atanga mithiam lokal Pu Vanlaldinga (MTS) leh Pu Utpal Bora (Field Assistant)  ten an nei thin dawn a ni.