Vawiin khan Assembly Committee Room-ah Chief Minister Pu Lal Thanhawla chuan Bairabi Zophai chungchangah meeting pawimawh tak a ko a. He hunah hian Joint NGO hruaitute chu sawrkar hmalak mek leh hmalak chhoh tum dan te sawipui a. MZP hruaitute leh NGO dang hruaitute pawhin  an rawtna leh hma la tura sawrkar an beisei dante Chief Minister hnenah hian an thlen a ni.

Chief Minister Pu Lal Thanhawla leh Joint NGO hruaitute hmaah  hian Union Home Secretary kaihhruaina hnuaia Mizoram Chief Secretary leh Assam Chief Secretary te inbiakna chungchang chu Chief Secretary Pu Arvind Ray team member te - Home Additional Secretary Pu Lalbiakzama leh Home OSD Pu David H.Lalthangliana ten an pe a ni.

Chief Minister Pu Lal Thanhawla kaihruai, Bairabi Zophai chungchanga inkawmna leh inrawnkhawmnaah hian Bairabi Zophai rawn tlawh a, rawn zirchiang tur MHA Fact Finding Team  te hnena lehkha pawimawh leh thil pawimawh thlentur awm thei te bakah a hmun zu fan pui huna sawipui a, kawhhmuh  tur te thlenga ngaihtuahtlan a ni.

Bairabi Zophai chungchangah hian March ni 20 khan New Delhi-ah Union Home Secretary kaihruaiin Mizoram leh Assam Chief Secretary te chu an lo inkawm tawh a.  March ni 27 khian MHA Joint Secretary Pu Satyendra Garg kaihruai MHA Fact Finding Team chuan a hmunah Bairabi Zophai hi an rawn zirchiang dawn a; Assam leh Mizoram aiawh Official te pawh an tel dawn a ni. State pahnih Chief Minister te inkawm hma in -  MHA Fact Finding Team te thil rawn hmuhdan leh zirchianna chu April ni 5 khian New Delhi-ah Union Home Secretary Pu Rajiv Gauba kaihruaina hnuaiah tho Mizoram leh Assam Chief Secretary ten  an sawidun leh phawt dawn a ni.