Vawiin khan Chapchar Kut lawmna kawnpui Field No:2 a hman chu bialtu MLA Pu Hmingdailova Khiangte chuan Kut Pa niin a hmanpui.

Kut Pa chuan Mizo te kut hlut ber leh pui ber Chapchar Kut lawmna hun hmang tura kalkhawm te chu lawmna chibai bukin Chapchar Kut chu khawvel hmun hrang hranga zofate min phuarkhawmtu leh min ti lungrual tu ni se a ti. Chapchar Kut lawmna chu a huau huau ang zawng ringawta la loin Mizo hnam kalphung, incheina leh Mizo lam chi hrang hrangte chu thangtharte hrilhhriatna leh entirna huna hmang turin a pawimawh a ni a ti a, Kan Kristianna nena inrem lo thil te thlauhthla ngama Pathian tih chungin hlim takin Chapchar Kut chu a hman theih thu a tarlang bawk.

Tunlai Mizo thangtharte nun chu nasa taka siamthat a ngaih thu sawiin Mizoram leh a bik takin Kolasib District chu  HIV/AIDS natna hluarna hmun a nih thu tarlangin hengte hian mihring taksa hriselna a khawih chhiat mai bakah kan ram leh hnam a ti hmelmawiloa, HIV/AIDS dona kawngah nasa taka tan lak a ngaih thu a tarlang a. Heng bakah hian zuk leh hmuam , ruihtheih thil laka fihlim turin tan lak a ngaih thu a sawi bawk a ni. Kut pa chuan Ram leh khawtlang hmasawn leh khawtlang muanawm alo awm zel theihnan thawhhona tha, inlungrualna leh tlawmngaihna te chu chhawm nung zelin zo nun ze mawi chu nunpui zel turin kalkhawm mipuite chu a chah a ni.

Pu H.Lalmuanpuia , president Awithangpa group YMA pawhin thu sawiin vawiin ni a Chapchar Kut lawmna an hman na chhan chu khaw mipui te hman hun remchang ber a nih thu tarlangin Khawtlang hruaitute leh Kohhran hruaitute nen pawh a inbe rawn chunga a lawmna hun hi ruahman a nih thu a tarlang bawk a, Chapchar kut chu ruihhlo tel loin hlim leh lawm takin a hman theih thu sawiin kalkhawm mipuite chu ruihtheih thil tel loa Kut lawm turin a sawm bawk  a ni.

Chapchar Kut lawmna hun ah hian hnam lam chi hrang hrang heng Cheraw, Khuangchawi, Sarlamkai, Chawnglaizawn, Siktui thiang leh Chheihlam te entir a ni a, Tualchhung leh Aizawl lam atanga zaithiam te an zai bawk a, chai nen kalkhawm mipui te chuan hun hlimawm tak an hmang bawk a ni.