Vawiin hian BNRGSK Hall, Serchhipah Mizoram State Commission for Women (MSCW) leh National Commission for Women, New Delhi tangkawp buatsaihin, Dan hnuaia Hmeichhiate dikna leh Chanvo inhrilhriatna  hun “Legal Awareness Programme  on Laws Related to Women” neih a ni. 

He hun hi Dr.T. Vanlaltani, MSCW in kaiihruaiin, Pi Margareth Zohmingthangi, IAS,(Rtd), Chairperson, MSCW in kalkhawmte lawmna thu sawiin, hmeichhiaten dikna leh chanvo humhalhna kawngah tih tur kan tihloh avanga harsatna tawh theih anih thu leh Dan hnuaiah tihtur dik tak kan tih chuan hmeichhiate tan himna a thlen thei  ani a ti a. Hemi kawnga mithiamte zirtirna chu uluk taka ngaihthlaa vawng turin a chahin, hmeichhiaten an dikna leh chanvo an humhalh kawngah  an hriattur pawimawhte hrilh hriat  an nih hnuah a taka hmang tangkai leh puangdarhtu YMA/VC/MHIP  branch  tin atanga kalkhawmte  chu hlawk taka hun hmang turin a duhsakna a hlan ani. 

Khuallian Pi Sangchin Chinzah, District Bawrhsap chuan Serchip District chhunga   hmeichhiaten dan hnuaia an dikna leh chanvo hrilh hriat thar leh na  tura duhsak taka he hun MSCW ten an rawn buatsaih chu lawmawm a tih thu sawiin, hmeichhiaten  an dikna leh chanvo tur dik tak an neih zel thehna tur a he hun hi hlawk taka hmang theuh turin kalkhawmte chu duhsakna a hlan bawk. 

Pi Zodinthangi, Member Secretary, MSCW in Mizoram State Commission for Women  hmalak dan kalphung hrang hrangte bakah  he Commission  din anih chhan leh a thil tumte sawiin, National  Commission for Women te hnathawh  dan kawng hrang hrang a sawi bawk a ni. 

Pu J.C Lalnunsanga, Advocate Aizawl chuan ‘Protection of Women from Domestic Violence Act & Mizo Dan thar’ tih thupui hmanga zirtirna pein. Nl.Sylvia Z. Ralte, Chief Judicial Magistrate, Kolasib chuan Hmeichhiate danin a humhim dan tih thupui zirtirna a pe bawk a, ”Pawngsual leh hmeichhe laka hleilenna - Pathian thu atanga thlirna” tih thupui hmangin Dr. Vanlaltani, Proffessor, Aizawl Theological College hnen atangin  thusawi ngiahthlak anih hnuah zawhna leh chhanna hun hman niin, sawihona hun hlawk tak hman ani bawk. 

He hunah hian  Serchhip khawpui chhung Veng tina Branch MHIP, YMA  leh Village Council tin aiawh mi 2  theuh an tel a ni.