Vawiin chawhma khan Higher And Technical Institute Mizoram (HATIM) Lunglei-ah Department of Environment, Forests & Climate Change buatsaihWorld House Sparrow Day (20th March, 2018), World Forestry Day (21st March, 2018) leh World Water Day (22nd March, 2018) te pualin ramngaw leh nungcha humhalh chungchang inziritirna hun Awareness Programme neih a ni. He hunah hian a kaihhnawih sawrkar department hotute, zirtirtute leh zirlai thahnem tak an kalkhawm.

He hunah hian Dr. C. Vidhyasagar, IFS, DFO Lunglei chuan “Forest and Climate Change” tih thupui hmangin kalkhawmte zirtirna a pe a. Mizoram chu nungcha hausakna neihna hmun ni mahse mipuiten kan ramngaw leh nungcha te humhalh tha tawk lovin kan ti chereu a, kan ram boruak sik leh sa pawh nasa takin a in thlak danglam chho mek a ni tiin nungcha leh ramngaw te humhalh kawngah nasa leh zuala tan kan lak a tul takzet a ni, a ti a. Kan nungcha leh ramngaw te humhalhna kawngah Mizoram sawrkarin nasa takin hma a la mek a, State Action Plan on Climate Change duang chhuah a nih tawh bakah Mizoram sawrkar hmalakna pawimawh tak New Economic Development Policy (NEDP) kaltlangin EF&CC leh UD&PA Department ten thahnemngai takin hma an la mek a ni, a ti. Ramngaw leh nungchate humhalhna kawngah mitin ten mawhphurna pawimawh tak kan nei theuh tih I hre thar ang u tiin hemi kawngah tlawmngai pawl hrang hrang leh khawtlang hruaitute nen thawhho na tha tak an nei chu lawmawm a tih thu a tarlang bawk. Zirlai kalkhawmte chu nakin lawka ram hruaitu tur an nih avangin hmathlir thui tak nei chungin taima taka an zirlaite zir turin a chah bawk.

Er K.Lalhmingmawia, SDO, PHE pawhin “Importance of Water Conservation” tih thupui hmangin zirtirna a pe a. Ramngaw kan humhalh that chuan tuihna pawh kan humhalh tel a ni tiin tun dinhmunah Mizoramah tui mamawhna a pun zel lain tuihna in tlem lam a pan zel a ni, a ti a.  Tuihna humhalh leh fur ruah tui khawl kawngah tan kan lak theuh a tul a ni tiin tuihna humhalh kawngah PHE Department leh YMA ten thawhhona thutlung an ziah thu a tarlang bawk.

He hun hi Dr. Rema Chhakchhuak, Principal HATIM in kaihruai a. World Sparrow Day, World Forestry Day leh World Water Day puala programme pawimawh tak zirlai te tana buatsaih a ni chu lawmawm tiin a buatsaihtu EF&CC Department te chungah lawmthu a sawi a. Zirlaite chu tui renchem taka hman an zirtir dan te, faina kawnga an hmalak dan te, kawlphetha renchem leh awmze nei taka hman an in ziritir dan te sawi langin HATIM Campus-ah Water Reservoir, Rainwater Harvesting, bawlhhawh sawngbawlna Solid Waste Management Plant, Sanitary Landfill leh Vermicompost Ground te nei tura chak taka hma an lak thu a tarlang a ni.

Pu C. Lalthankima, MFS, Assistant Conservator of Forests chuan lawmthu sawiin hun a khar a ni.

Attachment

  • Loading attachment...