Vawiin khan New Economic Development Policy (NEDP) hnuaia   khua leh tui harsa zawk ten chenna In tha zawk an lo neih theih nana hmalakna, Chief Minister's Rural Housing Scheme dawngtur thlanna chu DC Conference Hall, Keifangtlang, Champhaiah neih a ni a. Hamthatna dawngtur thlanna hun hi Champhai Bawrhsap Dr. Naveen Aggarwal, District Level Selection Committee for Chief Minister’s Rural Housing Scheme of NEDP hova  neih a ni.

District Level Selection Committee for CM’s Rural Housing Scheme of NEDP chuan hamthatna dawngtu chu India khua leh tui dik tak, EPIC leh Addhaar nei ngei nise a ti a. Uluk leh felfai taka kalpui aniha a dawngtur dik tak ten an dawn a, awmze nei leh rualkhai taka thlan anih theihna turin hma a la a ni.

He hunah hian Ngopa, Khawbung, Champhai leh Khawzawl Block Level Selection Committee on CM Rural Housing Scheme of NEDP kaltlanga dilna lutte ngun taka zirchian a ni a. Ngopa RD Block hnuaia atanga dilna lut 96 te chu pawm vek a ni a, Khawbung RD Block hnuaia diltu 210 atangin dawngtur mi 73-te chu meeting chuan a thlang fel bawk a. Khawzawl leh Champhai RD Block hnuaia Scheme hamthatna dawngtur thlanna chu BDO Chairman-na  hnuaia Block Level Selection Committee on CM’s Rural Housing Scheme kutah dah a ni a. Khawzawl RD Block hnuaia diltu 216 atangin  mi 92 in tanpuina an  dawng dawna, Champhai RD Block atanga diltu 192 atangin 154 thlanchhuah ten  hamthatna hi an dawng dawn bawk a ni.

Kum 2018-2019 chhungin Champhai District-ah mi 415 thlanchhuahte hnenah Insak/thawmthat tanpuina Rs 50,000/- theuh pek an ni ang a, avaia senso tur chu cheng nuai 207.50 niin sum hi hman mai theih turin DRDA kutah a awm tawh a. He scheme hi kumin April Ni 28, 2018 khan Pu Lalrinliana Sailo, Tuichang Assembly Constituency bialtu MLA chuan Champhai District-a hman theih turin a lo hawng tawh a ni.