Vawiin chawhma khan New Economic Development Policy (NEDP) hnuaia   khua leh tui harsa zawk ten chenna In tha zawk an lo neih theih nan a hmalakna, Chief Minister's Rural Housing Scheme   hawnna hun chu  I&PR Auditorium, CHANEM Building, Champhaiah neih a  ni a. He hunah hian Pu Lalrinliana Sailo, Tuichang Constituency bialtu MLA chu khuallian niin CM Rural Housing Scheme chu  Champhai District chhunga hman theih turin   a hawng.

Champhai DC Pu Vanlalngaihsaka kaihhruai programme-ah hian Khuallian Pu Lalrinliana Sailo chuan Champhai District hmun hrang hrang atanga   kalkhawm VC member-te chu chibai a buk a.  Mirethei zawkte dinhmun hrethiamtu Chief Minister hmalakna zara mirethei leh chhawmdawl ngaite tana In sakna tur Scheme siam a ni chu lawmawm a tih thu a sawi a. Chief Minister Housing Scheme chu sawrkar flagship programme NEDP hnuaia Scheme pawimawh tak anih thu sawiin, In sakna tur pawisa  chuan In  thar hlawk sakna daih lo mahse, Fur pui thlen huna  thli leh ruah laka himlo tur In te thawmthatna  anih dawn avangin , a chhenfakawm   a ni, a ti a. A mamawh leh dawng tlakte chauhin an dawn theihna turin nodal department leh khawtlang hruaitute  tan ho a pawimawh dawn thu a sawi a. CM Rural Housing Scheme chu Champhai District chhunga mirethei chenna tha neilo te tana chhenfakawm ni tur leh   In chhung hulhliap hnuaia an awm ve ngei theihna tura Scheme  tangkai tak anih ve ngei beisei chungin a hawng a ni.

Pi Zosangzuali Pachuau, Project Director, DRDA Champhai chuan scheme chungchang report a pe a.   Report -in a tarlan danin kum 2017-2018 Financial Year chhungin NEDP hnuaiah  CM Rural Housing Scheme kaltlangin Champhai , Kolasib, Mamit leh Aizawl District-te chu hmalakna atana  thlan a ni a.  Heng District  4 atang hian Beneficiary 2000 vel awm tur a tih niin, In pakhat  sak nan Rs 50,000 zel installmenta pek a ni ang a, a thar hlak sakna tur lam ai mahin thawmthat leh tihdanglam a kawk mah a. A theih hram chuan In sakna chak hlui emaw, tualchhunga awm chakte hman hram tur a ni a. In sak hna Contractor leh midang kuta dah a rem dawn lo a ni. Tin, IAY leh PMAY dawngte  a huam tel ve lo ang. District tina dawng thei tur    zat  chu  mamawh dan a zira thlanchhuah tur niin buaipui  mek a ni. Sum awmsa anih avangin a  dawngturte thlan anih ve leh a taka kalpui nghal vat tur a ni. District level CM Rural Housing Committte  leh Block Level CM Rural Housing Committee-ten a tul ang zelin hma an la dawn a. RD department chu Nodal Departmen niin, BDO leh VC ten a vil leh enzui hna an tum dawn a ni. Project Director Champhai chuan khawtlang hruaitute chu  programme pawimawh leh tul bikahte chauh an koh khawm thin avangin ngaipawimawha kal hram hram  thin turin a chah nghal bawk.

He hunah hian Line Department hotute leh District chhunga Village Council member-te an tel a ni.