India rama thingtlang khuaten mahnia inrelbawlna felfai (Village Self Governance) an neih theihna tura hmalakna Gram Swaraj Diwas chu Rural Development Department leh P&E Department te chuan vawiin hian DC Conference Hall Serchhipah an buatsaih. 

Pu VL Remliana, MCS, Project Director DRDA chuan Gram Swaraj Diwas chungchang a sawifiah a, sawrkar laipui hmalakna in Gram Swaraj Diwas  chungchang inzirtirna hun hi ni 14 April, 2018 atanga ni 5 May, 2018 chhunga neih tur niin, hemi hun chhung hian mipuite hnenah hmasawnna atana remna leh muanna pawimawhnate, mirethei chawikanna scheme ten miretheite hnen a thlen ngei theih nana hmalakna te, sawrkar scheme kallai mek tihhmasawnna turte leh faina kawnga tanlakna tur kawng hrang hrangte hrilhhriat hi a thil tum a ni a ti. 

He hunah hian Rural Development Department hnuaia hmansawnna hnathawh hrang hrangte leh P&E Department hnuaia hmalaknate a lem nena entirin kalkhawmte hrilhhriat an ni a. Serchhip District chhung RD Block 2 a VC 51 awmah MNREGS hnuaia Job Card nei chungkaw 14117 ten sawrkar laipuiin hnathawh tur a rawn ruahman atangin 82.86% chu tha takin an thawk a. Miretheite in sak tanpuina Pradhan Mantri Awas Yojana (PMAY) atangin Serchhip District chhung RD Block 2 ah in sak tanpui dawng chhungkua 56 awmin, heng zinga In 9 chu sak zawh fel tawh ani bawk. Ministry of Rural Electricfication, Government of India hnuaia kum 2019 chhunga in tinin Electrict Connection an neih vek theihna tura ruahmanna kallai mek Pradhan Mantri Awas Yojana-Housing for All/Saubhagya Scheme hnuaiah Serchhip P&E Departement chuan Socio Economic Caste Census (SECC) 2011 data atanga chhuta thlawna Electrict Connection dawng thei Chhungkaw 40 te hnena Electrict Free Connection pek turah Chhungkaw 20 te hnenah pek fel an ni tawh bawk ani. 

He hunah hian Serchhip District Village Council te zinga Village Level a hnathawk tha bera thlan Serchhip Village Council-III hnenah Pu VL Remliana, Project Director chuan lawmman a hlan a ni. 

Sawrkar laipui atang endiktu atana lo kalte- Pu Laltana Chhangte, Deputy Secretary, Ministry of Home Affairs leh Pu Jogi Nath Pradhan, Addl. General Manager, Rural Electrification Corporation, Ministry of Power & Electricity te chuan he hun hi an hman pui a. Kan kalphungte leh hmalakna te pawh a tha an tiin, Mizoram chu Model State atana puan hial tlak nia an hriat thu an sawi bawk. 

He hunah hian Serchhipa Village Council hrang hrang memberte an kal tha hle a,  Pu M. Lalhmingthanga, EE P&E Department chuan lawmthu sawiin hun a khar a ni.