170/2023-2024

Champhai, the 21st April, 2023: Vawiin chawhma dar 11 khan I&PR Auditorium, CHANEM Building, Champhaiah Civil Services Day 2023 puala hun hman a ni.

He huna thusawitu Addl. DC Champhai Pu M.Misael chuan Civil Services Day puala hun hman chuan mipui tana rawngbawltu Sawrkar hnathawkte thinlungah inpekna nasa zawk tuh ngei se a duh thu sawiin, Sawrkarin nghawngkawl min bahtir hlenchhuah hi kan mawhphurhna a ni, a ti a. Mipui rawngbawl kawngah Department hrang hrangte hnathawh dan a inang vek lo maithei, mahni huangah theuh erawh theihtawp chhuah zui zel hi kan mawhphurhna a ni, a ti a. Civil Services Day chu infuihtharna ni nise a duh thu sawiin, Sawrkar duhdan leh mipuite hmakhua ngai chunga thawk zel turin kalkhawmte a chah a. Nihna leh dinhmun mai duh tawk lova, a kentel mawhphurhna mipuite chhiahhlawh nihna inhriaa theihtawp chhuah tum theuh turin kalkhawmte a ngen bawk.

He hun hi Pu Lalbiakfela, EO/DUDO Champhai chuan kaihruaiin Pi Esther Leihang, SDC in District Administration hnathawhte a tarlang a. Pu C.C. Sakhawliana, DCSO in Public Distribution System (PDS) chungchang a sawifiah hnuah Er. ZD Dengthuama, EE, PHED Champhaiin Jal Jeevan Mission (JJM) hmalakna a sawifiah a. Pu Larry Lalbiaktluanga, RAO, DRDO Champhaiin Rural Development Scheme pawimawhte a sawifiah bawk.

He huna tarlan a nih dan chuan financial year 2022-2023 chhungin Champhai District-a Job Card nei 18,132 te tan ni 100 inhlawhna siam a ni a. Pradhan Mantri Krishi Sinchayee Yojana (WDC) 2.0, 2021-2022 atan project 2, khaw 4 tuam tur kalpui a ni a. Hemi hun chhung vek hian PMAY (G) hamthatna dawngtu 379 an awm bawk a ni. National Food Security Act (NFSA) 2013 kaltlangin a thlawnin AAY chhungkaw tan buhfai kg 35 leh PHH mi pakhat zel tan kg 5 sem chhuah a ni a. Mid Day Meal bakah AAY/PHH beneficiary-te tan fortified rice sem chhuah thin niin, 'One Nation One Ration Card' kaltlangin ration card number hriat chuan khawi hmunah pawh ration a lak theih a. December 2022 thla tir atangin Online LPG Delivery Keifangtlang leh Venglai ahte hmalakna hmasa atan kalpui tan a ni. Kum 2024 ral hmaa thingtlang in tina tui connection pekna tur scheme, Jal Jeevan Mission kaltlangin Champhai District-a khaw 12 tuipekna zawhfel tawh niin, khaw 30 ahte kalpui mek zel a ni bawk.

Civil Services Day hi Mizoramah chuan kum 2016 atanga hman tan a ni a. Ram puma hman hmasakna ber chu kum 2006 khan New Delhi-a, Vigyan Bhawan-ah hman a ni a. India ramin zalenna a neih hnua Home Minister hmasa ber Sardar Vallabhbhai Patela’n Administrative Services Officer, probationer-te puala Metcalf House, Delhi-a kum 1947 April ni 21-a a thusawi pualin mipuite rawngbawl tura inhlanthar lehna atan he ni hi hman thin a ni.