169/2023-2024

Lunglei the 21st April, 2203 : Dan anga Kawrpuichhuah kaltlanga India leh Bangladesh insumdawn tawn theihna tura ruahmanna ti puitling turin, ram pahnihin inremna an siam zulzuia hma lak zel a ngai tih, Home Minister Pu Lalchamliana'n tukina Kawrpuichhuah a tlawhnaah a sawi.

Zan khat riaka Tlabung tlawha zin Mizoram Home Minister Pu Lalchamliana chuan tukina Kawrpuichhuah a tlawhnaah, Bangladesh nena insumdawn tawnna tura ruahmanna ti puitling turin Mizoram Sorkar-in theihtawp a chhuah zel tih sawiin, "Mizoram Chief Minister Pu Zoramthanga bakah, Commerce and Industries Minister Dr. R Lalthangliana-te pawh tum engemaw zat Bangladesh-ah an kal tawh a ni," a ti a, Bangladesh lam atang pawhin an Commerce Minister Pu Tipu Munshi leh official pawimawh dangten Kawrpuichhuah pawh an tlawh tawh thu a sawi.

Kawrpuichhuah Integrated Check Post-in a ken tel, inkalpawhna lei dawh kai tur chu a ruangam duan danah tih fuh tawk loh a awm vanga tih that leh mek a nih thu leh, ruahman ang chuan, Home Department lam pawhin Immigration Check Post bun an tum thu a sawi a, ICP chu a nih dan tur ang a nih hunah, ramri bula awmten nasa taka an chhawr tur thu leh, eizawnna remchang pawh zau taka a inhawn tur thu a sawi.

Remna leh muanna a awm loh chuan hmasawnna in a tuar phah tih Mizoram Home Minister Pu Lalchamliana chuan sawiin, Bangladesh ram lama chengte nen inlaichinna tha tak neih tum turin, mipui kalkhawmte a chah a, boruak ralmuan lohnaah chuan mihring tam takin nunna an chan thin avangin, chu chuan nun a tihnawm loh thu leh, hmasawna thlenga a nghawng thin thu a sawi.

15th Finance Commission-in India ram puma Fire station tih changtlunna tura sum a ruahman cheng vaibelchhe 1500 atangin, Lunglei District bik tan cheng vaibelchhe 4 dah a nih thu leh, hemi hmang hian Tlabunga Fire Station pawh tuam tel a nih tur thu, Mizoram Home Minister chuan a sawi a, hei bakah hian kuthnathawktute khaichhuahna tura SEDP kalpui mek hnuaiah, tun Sorkar kum kal lai chhungin, chhungkaw 60,000 dang tuam leh tum a nih thu te, a hmaa cheng 50,000 dawng tawh chhungkaw 60,000 hnenah pawh tanpuina sum fai pek leh tum a nih thu, a sawi bawk.

Mizoram Home Minister Pu Lalchamliana hi IGP (Hqrs.) Pu John Neihlaia, DIG (Southern Range) Pu H Ramthlengliana leh, Lunglei SP Pu Rahul Alwal bakah, party lama hotu thenkhatten an tawiawm a, West Tuipui bialtu MLA Pu Nihar Kanti Chakma-hoin party hruaituten an lo dawngsawng a ni.