No.1305/2020-2021

Vawiin chawhnu khan Community Quarantine Centre tura ruat Bethel Kohhran Hall hrang hrangte leh Vengthlang North Sunday School Hall te hman dan tur leh inkaihhruaina chungchanga inhrilhriatna hun Bethel Pastor Quarter leh Vengthlang North Kohhran Committee Room ah te neih a ni. Ruahman dan chuan Bethel Kohhran Hall te leh Vengthlang North Sunday School Hall te hi tangkhang lo thleng leh hmasa tur te khunghranna Community Quarantine Centre atan hman hmasak tum a ni a. Naktuk maia tangkhang lo haw thleng tur Manipur atanga lo haw 9 te leh Telengana atanga lo haw mek mi 40 bawr vel kar leh Thawhtanni a lo thleng tura beisei te Bethel Kohhran Hall-ah te dahluh an ni dawn a. Vengthlang North Sunday School Hall-ah hian Shillong atanga lo haw mek mi 25 bawr vel naktuk zana thleng tura beisei te dahluh tura ruahman a ni bawk.

Pu Lalnunfela Chawngthu, SDO Sadar chuan haw tur in report leh a taka rawn haw te a list a danglam ve zel avangin khunghranna tur hmun siam fel a harsat phah viau thin thu a sawi a. Kalkawnga an thang tur chen sawi lawk theih anih chiah loh avangin Kohhran te pawh tihbuai angaih chang a awm dawn thu sawiin an hriatthiamna a ngen a. Medical Screening leh Rapid Test te VANIS a neih hmasak anih hnua a him chauh Kohhran ruat Quarantine Centre ah dahluh an nih tur thu a sawi a. Bethel Kohhran leh Vengthlang North Kohhrante chu Sawrkar Facility ni lova tangkhang lo haw te thleng hmasa ber tur te an nih thu sawiin, harsatna leh mamawh neihte thuneitute hnena thlena theihtawp chhuah turin a ngen.

Pu Laldingliana Hrahsel, EE&WRD, Nodal Officer, District Quarantine Centre chuan hmunhma nei tha tak Kohhran ten an hmunhma te tlawmngai leh phal taka Quarantine Centre atana hman an phal chu lawmawm a tih thu a sawi bawk.

Pu C. Lalsawta, SDPO pawhin thu sawiin Kohhrante inphalna chu fakawm tiin, Security chungchangah a tul ang zela Police ten an tlawh kual thin dawn thu a sawi bawk.

Dr. Samuel Laldinthara, MO, IDSP chuan lo thengte VANIS ah hruai hmasak a uluk taka Medical Screening leh Rapid Test neih an nih zel dawn thu a sawi a. Rapid Test (RAT) paltlang te chauh Quarantine Centre ah dah luh an ni ang a, reactive a awm chuan District Hospital ah throat swab sample lain ZMC ah thawn thlak tur a ni ang, a ti. Covid-19 chu pawngpaw hlauh ringawt tur ani lo a, PPE pawh damlo leh rinhlelh te bula awm ngaite nih lem loh chuan hman kher a ngaih loh thu a sawi a. Quarantine Centre te Medical Team in a tul leh mamawh dan ang zela an vil dawn thu a sawi bawk.

Kohhran hruaitute chuan Kohhran a inruahman mek zel thu sawiin, Kohhran chuan lo dawnsawna an mamawh leh tul dangte buaipui an inhuam reng dawn thu an sawi a ni.

He hunah hian Kohhran Hall Quarantine Centre kalpui tura tul hrang hrang, Security, Medical, ei leh in bakah inkaihhruaina dangte sawiho a ni.

Tun dinhmunah hian DPRC Quarantine Centre ah mi 22, Tlangsam Polytechnic Quarantine Centre ah mi 66 an awm mek a ni. Kawng laka thang mek Manipur atanga lo haw mi 9 naktukah an lo thleng dawn a. Meghalaya atangin mi 25 bawr vel naktuk zana thleng tura beisei an ni a, Telengana atangin mi 40 bawr vel te kawng lakah an la thang meka Thawhtanni ah an lo thlen beisei a ni. Beisei dan chuan May Ni 25 hian Karnataka atanga in report mi 96 vel an rawn haw tan dawn bawk a ni.

Champhai khawpui leh a chhehvela Kohhran 18 te chuan Community Quarantine Centre tura an inhuam thu an thlen tawh a. Heng zinga Kohhran 6 ten ei leh in an tum sak thei dawna, Security chungchang pawh Kohhran 1 tih loh chuan an kenkawh theih deuh vek dawn thu an thlen tawh bawk a ni. Community Quarantine Centre ah hian mi 400 bawr vel dah theih tura ngaih a ni.