1135/2024-2025

Champhai, 10th July, 2024:  Vawiin khan Deputy Commissioner Office, District Civil Supply Office leh Consumer Union te huaihawtin Govt. Champhai College Multipurpose Hall-ah Consumer Awareness Programme neih a ni a. July ni 1, 2024 atanga hman tan Criminal Laws pathumte zirhona hun neih a ni bawk.

Consumer Awareness Programme kaihruaitu Pu K. Zorammuana, Addl. DC, Champhai chuan kalkhawmte inlawmna thu sawiin, Consumer-te dikna chanvo humhalh chungchang kamkeuna thu a sawi a. Consumer ten an dikna chanvo an hmuh theih nan tan rual a pawimawh a, hei vang hian lehkha thiam zawk college zirlai ten a hre lo zawkte an hrilhfiah a ngai a ni, a ti.

He hunah hian Champhai District Civil Supply Officer Pu CC Sakhawliana chuan LPG Home Delivery chungchang te, ram pum huapa Ration Card pakhat hman theih dan (One Nation, One Ration Card) chungchang te, Not Entitled for Ration (NER) Card chungchang te leh Consumer-te chanvo humhalh a nih dan te a sawi a. Dr. Vanlalnunpuii Ralte, SDC Champhai chuan Consumer Protection Act 2019 sawi zauna hun a hmang a. Consumer-te dikna humhim turin Central, State leh District-ah te Consumer Protection Authority din a ni tih a tarlang.

Pi K. Lalrinfimi, District Mission Coordinator, Social Welfare Department, Champhai District chuan he hunah hian Indian Penal Code (IPC), the Criminal Procedure Code (CrPC) leh Indian Evidence Act te thlaktu Criminal Law thar pathum - Bhartiya Nyaya Sanhita (BNS), the Bhartiya Nagrik Suraksha Sanhita (BNSS) leh Bhartiya Sakshya Adhiniyam (BSA) te sawi zauna hun a hmang bawk.