1136/2024-2025

Aizawl dated 10th July 2024: Vawiin chawhnu khan Agriculture Minister pisaah Global Environment Facility kaltlang a Green-Ag cum Green Landscape Information Platform (GLIP) hnuai a hmalakna enhona hun hman niin Lunglei leh Mamit district chhung a khaw 38-a hnathawhna tur hmanrua semchhuah nghal a ni a. Pu PC Vanlalruata, Minister, Agriculture Department chuan he hun hi hmanpuiin Pu Lalnunhlua, Additional Secretary chuan hun a kaihruai a ni.

Agriculture Minister Pu PC Vanlalruata chuan Green-Ag kaltlang a Mizoram chhung a ramngaw kan neih te humhalh chung a kuthnathawktute tan a enzawnna ngelnghet siam tur a hmalakna kalpui a ni chu lawmawm a tih thu sawiin Green-Ag kalpuina State hrang hrang zing ah hmahruaitu nih tum zel turin thawktute a chah a. Kuthnathawktute tihmasawn tur a thawktu an ni tih hre reng turin leh neitu nihna thinlungpu chung a rinawm tak a hna thawk turin a fuih bawk a ni. Minister chuan Green-Ag cum GLIP chu ei leh bar a kan intodelhna kawng a hmanraw pawimawh tak a nih a beisei thu sawiin a thil tum te hlawhtling tak a kalpui zel a nih theih nan uluk zawkin Agriculture Department-a thawktuten an vilpui zel tur thu a sawi bawk a ni.

Pu R.Lalnunzira, Addl. Director chuan Mizoram a Green-Ag thil tum te tihlawhtling tur chuan inpekna leh neitu nihna thinlungpu chung a thawktuten hna an thawh a pawimawh thu a sawi a. Kuthnathawktute harsatna leh mamawh zirchiang a, an mamawh mil a ruahmanna siam leh chung ruahmannate tih hlawhtlin ngei a nih theih nana bawhzui chak turin thawktute a fuih a ni.

Dr. Kenny Vanlalhriatpuia, State Technical Coordinator, Green-Ag chuan Green-Ag hnuai a ruahmanna hrang hrang sawi zauna hun a hmang a. Pi Lalchhuanawmi Pachuau, Team Leader, Green – Ag chuan hmalakna kalpui tawh dan report pein Pi T.Lalramdinmawii, Budget & Finance Officer, Green-Ag chuan sum dinhmun report a pe a. Pu Lalmalsawma, Joint Director (R&M), State Project Coordinator chuan lawmthu sawina hun a hmang bawk a ni.

Report a tarlan danin Green-Ag hi Sustainable Development Goals leh Food & Agriculture Organisation thil tum thenkhat tihlawhtling tur a hmalakna pawimawh tak a ni a. Mizoramah hian Lunglei leh Mamit district-a khaw 38-ah hmalakna kalpui mek niin kum 2027 thleng awh tur a ruahman a ni. Kuthnathawktuten ramngaw tichereu lo zawng a eizawnna ngelnghet an neih theih nan ruahmanna hrang hrang siam niin Farmer Field School kaltlangin loneitute leh ran vulhtute hnen ah zirtirnate pek thin a ni a. Village Implementation Committee din niin khaw hrang hrangin an mamawh mil zel a ruahmanna siamin hmalakna kalpui thin a nih thu tarlan a ni.