1137/2024-2025

Aizawl, 10^th July, 2024 : Higher & Technical Education Minister Dr Vanlalthlana chuan vawiin khan Pachhunga University College (PUC) Multipurpose Auditorium-ah zirlai ti tha chawimawina leh kal tharte lawmna khuallian niin a hmanpuia, Pu JeJe Lalpekhlua, MLA chu khualzahawm a ni.

He hunah hian thu sawiin khuallian Dr Vanlalthlana chuan PUC a zirlaite chu an vanneihzia hre tura chahin zirtirtu tha tak takte kaihhruain ahnuaiah zirna mai bakah mimal nun thlenga hmasawnna char thar tur a tam tih a sawi a, amah ngei pawhin he college a thawk thin a nih thu sawiin tun dinhmun thleng tura kawng sah kuak saktu a nih thu a sawi bawk a ni. Zirlaite chu tih tak takna leh dawhtheihna nena zir tura chahin anmahni pawh khawvel hmasawn dan ang zela intuaihriam reng turin a chah a, Company lian leh ropui tak tak-Nokia, Kodak, Blockbuster etc., te pawh khawvel hmasawnna in a ken tel anga an in update duh ve loh avangin an tlachhe tawh a, hetiang chiah hian keini pawh khawvel hmasawnna mil zelin a tha lamah kan in update ve zel a pawimawh a ti a, college in activities chi hrang hrang a buatsaih thin a, hengte hi zirlaite kawng hrang hranga an hmasawnna atana tih a nih avangin classroom chhung leh pawnah hmasawnna tur zawng zel turin a chah a ni.

PUC Principal, Prof. H. Lalthanzara pawhin he hunah hian thu sawiin, PUC a lut tharte chu College an kal chhung a College in a pek theih thiamna te, Library hmang tangkai tur te, PUC resource a neih dang dangte hmang tangkai turin a chah a. Zirlai pass chhuak ta te lawmpuina thu sawiin, an hmalam hun atan duhsakna sang ber a hlan bawk a ni.

Felicitation programme ah hian MZU undergraduate examination, 2024 a Department tina top 10 ni pha te chu chawimawina certificate leh pawisa fai hlan an ni a. Stream hrang hranga ti tha berte hnenah “Proficiency Award” hlan a ni a, chungte chu:

1. Lenrual Hlui Award (Science Topper, MZU) : Lalhriatzuala, Chemistry Subject chu pek a ni a. Lalhriatzuala hi MZU UG Exam-a Science stream a Gold Medalist a ni bawk.

2. H.K. Bawichhuaka Award (Arts Topper, MZU) : Lalhlimpuii, Economics Subject chu pek a ni a. Lalhlimpuii hi MZU UG Exam-a Arts stream a Gold Medalist a ni bawk a ni.

3. Khawtinkhuma Award (Commerce Topper, MZU) : David R. Lalhumhima, Commerce Subject chu pek a ni a. Lalhumhima hi MZU UG Exam-a Commerce subject-a Gold Medalist a ni.

4. Dr. H. Lallungmuana Award (Management Topper, MZU) : Dolly Malsawmtluangi Management subject chu pek a ni. Dolly Malsawmtluangi hi MZU UG Exam-a Management subject-a Gold Medalist a ni bawk.

Kum 2023-2024 chhunga PUC zirlai tha ber, Student of the Year atan  Lalnunpuii Hlawndo, Dept. of Economics chu thlan a ni a, Student of the Year atan hian academic record mai bakah college activities chi hrang hranga zirlaite chet that dan tehfunga hman a ni.

Kumin hian PUC atangin UG stream hrang hrangah mi 960 in final semester examination an hmachhawn a, chung zinga zirlai 830 chuan pass in, pass percentage hi 86.46 a ni. Arts subject hrang hrang atangin top ten rank nei mi 67 an awm a, Science stream atangin top ten rank nei mi 68 an awm a. Commerce atangin mi 5 leh Management atangin mi 10 an awm a. MZU under graduate exam-2024 ah hian PUC atangin rank nei zawng zawng zat hi mi 150 an ni a. MZU hnuai rank holder awm zawng zawng zat mi 227 atangin PUC atanga rank holder mi 150 te hian  za zela 66 an hauh phak a ni.

PUC ah hian tun dinhmun ah UG course hrang hrang 23 leh PG course 5 zir theih a niin, zirlai awm zawng zawng hi UG ah mi 2600 chuang an ni tawh a. Zirlai lut thar turte tan admission hi Pachhunga University College Entrance Test (PUCET) leh Common University Entrance Test (CUET) hmangin admission hi tih a ni a. Zirlai lut thar 725 awm tawhin, Common University Entrance Test (CUET) hmanga lut turte tan admission la tih mek zel a ni bawk. PUC ah hian India ram hmun hrang hrang atanga zirlai an neih bakah, international students mi engamawzat- Egypt, Uganda, Afghanistan, Myanmar atangin an awm bawk a ni.