624/2024-2025

Champhai, the 31st May, 2024: General Election to Lok Sabha, 2024 a vote tlate chhiar tura Champhai District-a inpuahchahna kalpui mek zelah vawiin chawhnu dar 2:00 khan District Election Office, Champhai buatsaihin DC Conference Hall-ah vote chhiar kalpui dan endik tura ruat Counting Micro-Observer-te tan training thawhhnihna leh a hmawrbawkna buatsaih a ni.

He hun hmanpuitu Pu James Lalrinchhana, Assistant Returning Officer (ARO) chuan Lok Sabha Election hmawrbawk chhoh mek zel a nih thu sawiin, Micro Observer-te chu training tha tak neia vote chhiar inringtawk taka hmachhawn turin a fuih a. Counting Observer puitu tur leh amah ang tluka pawimawh an nih thu a sawi a. Vote chhiar kalpui dan a felfai em tih endik tur an nih avangin vote chhiar turte thiam ang hriat fai vek tum turin a chah a, duhsakna a hlan nghal bawk.

Vawiin Micro-Observer training buatsaih hi Pu Benjamin Zalawma Ralte, Election Officer chuan kaihruaiin vote chhiar ni atana ruahmanna siamte a sawifiah a. Pi Lalhruaitluangi, SO, State Level Master Trainer (SLMT) in Counting Micro-Observer-te tihtur leh mawhphurhnate a sawifiah bawk.

Hemi hnu hian Counting Micro-Observer-te tan EVM/VVPAT khawih dan leh vote tla chhiar dan ataka entirna leh inzirtirna neih a ni.

Lok Sabha Inthlanpuia vote tlate hi June ni 4, 2024 hian chhiar a ni dawn a, Champhai District chhunga Assembly Segment 3 a vote tlate chhiar dan endik tur hian ECI chuan Counting Observer atan Pu Mansoor Aslam Chowdhar, SCS (JK), 2001 chu a ruat a, Counting Observer pui tur hian Counting Micro-Observer 32 ruat an ni.