623/2024-2025

Kolasib dated 31st May, 2024: Vawiin chawhnu khan a tum hnihna atan Govt. Kolasib College-a Counting Hall-ah Counting Micro Observer, Counting Supervisor leh Counting Assistant-te tan Lok Sabha MP Election 2024-a vote tla chhiarna kalpui dan tur inzirtirna neih a ni a. Pu John LT Sanga, Deputy Commissioner chuan Counting Official-te fuihna thu sawiin Pu Victor Lalawmpuia, SDO(C), Vairengte, Pi Christina Lalmuanzuali, Election Officer, Pi F. Lalnisai, BDO, Thingdawl leh Pu Gilbert Lalhlimpuia ten training hi an pe a ni.

Pu John LT Sanga, Deputy Commissioner chuan Kolasib district-ah Lok Sabha MP Election 2024 tluang tak a kalpui a nih thu sawiin inthlanna felfai neihna tur a mawhphurhna hrang hrang tha tak a hlenchhuaktute chungah lawmthu a sawi a. Inthlan hmawrbawkna tur a vote tla chhiar pawh tha tak a kalpui a nih theih nan Training-na hun chu tangkai tak a hmang turin Counting Official-te a chah. Vote chhiar tur Counting Official-te thutna tur tihchianna, ‘Final Randomization’ chu June ni 4 zing dar 5-ah kalpui tur a nih thu Pu John LT Sanga chuan sawiin hemi ni vek, chawhma dar 8 atangin Vote chhiar hi kalpui tan tur a nih thu a sawi a. Inthlan result chu Returning Officer, Aizawl District-in a puan tur thu a sawi.

Kolasib District-a Lok Sabha MP Election 2024-a vote tla te chu Govt. Kolasib College-a ‘Counting Hall’ pathum ah June ni 4, chawhma dar 8:00 a chhiar tan tur a ruahman a ni a. Vote tla chhiar tur hian ‘Counting Supervisor’ mi 47, ‘Counting Assistant’ leh ‘Counting Micro Observer’ atan mi 42 ve ve ruat an ni a. 4-Tuirial Assembly Segment atan Counting table 9, 5-Kolasib Assembly Segment atan 10 leh 6-Serlui Assembly Segment atan Counting table 12 ruahman a ni.