652/2024-2025

Champhai, the 3rd June, 2024: Champhai District chhunga Lok Sabha Inthlanpui, 2024 a vote tla chhiar endik tura Election Commission of India (ECI) in a ruat Counting Observer Pu Souvik Banerjee, SCS, West Bengal (2002) chuan vawiin tlai khan Champhai a thleng a, vote chhiar tura inpuahchahnate enfiahin second randomization of counting officials a neihpui bawk. 

Pu Souvik Banerjee chuan ECI tirha lokal a nih thu leh election danin a phut angin vote chhiar a ni em tih enfiah tura lokal a nih thu tarlangin, vote chhiar tura Champhai District inpuahchahna tha a tih thu a sawi a. Boruak muanawm tak hnuaiah felfai taka vote chhiar zawhfel a nih ngei a beisei thu a sawi a. Vote chhiar turte leh duty tur zawng zawngte chu mawhphurhna an neihte tha taka hlenchhuah tum turin a chah a, ECI siam inkaihhruaina  ngaihpawimawh tulte a tarlang bawk. 

Counting Observer hian District Election Officer & ARO Pu James Lalrinchhana leh District Election Official-te DC Office Chamber-ah vote chhiar tura inpuahchahna leh ruahmanna siamte a sawipui a. He hunah hian ARO te'n Asembly Segment tina vote chhiar tura ruahmanna siamte an sawifiah a. Counting Observer chuan Strong room, Counting Centre leh Counting Hall puahchah dante leh security arrangement-te a enfiah bakah Counting Official vote chhiar turte Asembly Segment pathuma semrualna, Second Randomization of Counting Officials neihpui bawkin Counting Supervisor 30, Counting Assistant 30 leh Counting Micro-Observer 32 te an duty-na tur Assembly Segment-ah khawl hmanga semrual an ni. 

Ruahman dan chuan naktuk zing dar 5 hian Counting Observer kaihhruaiin Counting Official-te an duty-na tur theuh Asembly Segment hnuaia Counting Table-a semrualna, Final Randomization of Counting Officials neih a ni dawn a. Hemi hnu hian zing dar 8:00 atangin Champhai District chhung Assembly Segment pathuma vote tlate Counting Hall hran theuhah chhiar a ni dawn a. Counting Hall tinah hian counting table 8 theuh siam a ni a, heng zinga pakhat hi VVPAT chhiarna tur VVPAT Counting Booth (VCB) niin, vote tlate hi round 4 ah chhiar zawhfel a ni ang.