2900/2023-2024

Champhai the 1st December, 2023- Mizoram Legislative Assembly Inthlanpui, 2023-a Champhai District-a Vote chhiara duty tur office staff te tan vawiin khan Champhai Dc Conference Hall, Keifangtlangah training buatsaih a ni.

Champhai DC & DEO Pu James Lalrinchhana chuan Mizoram Legislative Assembly Inthlanpui, 2023-a a kul a taia thawktu Office staff te thawhrimna leh inpekna chu fakawm a tih thu sawiin an chungah lawmthu a sawi a. Champhai District-ah Election process hlawhtling taka zawhfel anih ngei theihnan Vote Chhiar Ni ah [awh thahnemngai lek uluk taka duty chhunzawm turin a chah a ni.

Vawiin training program hi Champhai Election Officer Pu Benjamin Zalawma Ralte in a kaihruai a. Pu Lalrinawma Khiangte, SDO (S) leh State Level Master Trainer ni bawk chuan Office staff-te mawhphurna hrang hrang (duties & responsibilities) te leh Vote chhiar ni a tih tur leh tih loh tur te a zirtir a. Chawhnu lamah Counting Hall tinah vote chhiar tih chhinna (dry run) neih nghal a ni bawk a ni. Election a duty tur office staff te hi group hrang hranga then niin, Ata Entry Operator, Hall Duty, Videography, Strong Room Duty, EVM Carrier, EVM Sealing, Reception, Ushering, Refreshment leh Official Communication Centre duty-te an awm dawn a ni.

Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 atangin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh leh VVPAt Slip chhiarna tir “VVPAT Counting Booth” a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni a. Zing dar 8:00 ah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni a.

Round tina Vote tla te hi Official Communication Centre, DC Office, Keifangtlang atangin Public Announcement System hmangin mipuite hriattur in puan chhuah a ni dawn a. CCN Cable leh LCN Zokhawpui te chuan Live coverage an nei dawn bawk a ni.