2899/2023-2024

Hnahthial the 1st December 2023: Hnahthial District-a Assembly Constituency awm chhun 29-South Tuipui (ST) AC a vote chhiar ni a media centre hmunhma leh inremfel dan thlirhona neiin vawiin khan DC Office chamber, Hnahthial-ah District Election Officer, Pu Chuauhnuna leh chanchinthar thehdarhtute an thukhawm.

He hunah hian DEO Pu Chuauhnuna chuan Hnahthial District in a vawikhatnan election a hmachhawnnaah chanchinthar thehdarhtute tawiawmna leh vantlang mipui thawhhona zarah tluang taka vote thlak zawh theih a nih avanga lawmawm a tih thu a sawi a, media mi te pawimawhna sawiin vote chhiar ni leh result puan zawh thlenga theihtawp chhuahpui turin a sawm nghal bawk a ni.

29-South Tuipui (ST) AC Returning Officer Pu Lalvenhima, Addl DC ni bawk chuan vawiina an in kohkhawm chhan sawiin vote chhiar ni a Media centre inbuatsaihna leh tul dangte inhrilhhriat a ni a ti a, vote chhiar ni a security ruahmante tarlangin ECI atanga Authority Letter nei media-te hriat tur tul leh pawimawhte hrilhhriatna a nei bawk. Authority letter nei media-te chu tul leh mamawh-ah counting centre chhung luh leh chhuah khapsak an nih loh thu tarlangin counting hall a camera hman phal chin leh thla lak phal chin te a tarlang a, counting hall-ah phone kenluh phal a nih loh thu a tarlang bawk. November ni 7 a vote chhiar tura an inbuatsaihna hrang hrangte tarlangin zing Dar 8 atangin Postal Ballot vote chhiar tan ni dawnin darkar chanve hnuah EVM chhiar tan a nih tur thu a tarlang a. Round tin vote chhiar zawhin ENCORE ah upload a ni dawn tiin RO leh Observer in a sign fel hnuah Media centre-ah hriattir hmasak ber a nih tur thu a sawi bawk a ni.

He hunah hian Hnahthial DEO Pu Chuauhnuna leh RO Pu Lalvenhima bakah ARO 2, Pu Neng Thianlala leh Pi Betty Lalrinfeli te a tel a, Hnahthial District chhunga print media hrang hrangte bakah local cable nei tute an tel bawk a ni.