2898/2023-2024

2023 Pawltlak thla ni 1: Mizoram Legislative Assembly Inthlanpui, 2023 buatsaiha Kolasib District chhunga assembly bial pathum - 4-Tuirial, 5-Kolasib leh 6-Serlui biala vote tlate chhiar huna vote chhiar enpui tura ruat, micro observer-te tan vawiin chawhma khan DC Conference Hall, Kolasib-ah training vawi hnihna buatsaih a ni.

He training hi Kolasib District Election Officer Pu John LT Sanga chuan hawngin, micro observer atana ruatte chu an mawhphurhnate ṭha taka hlen chhuak turin a chah a. He hunah hian Returning Officer-te leh Assistant Returning Officer-te pawh an tel a ni.

District Level Master Trainer Pi F. Lalnisai, Block Development Officer, Thingdawl chuan training hi pein, inthlan vote chhiar dan kalphung leh micro observer-te tana hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.

Micro observer-te hi felfai leh dik taka inthlan vote chhiar a nih theih nana enpuitu leh viltu atana ruat an ni a. Inthlan vote chhiar danah thil fel lo eng mah a awm lo tih tichiang turin vote chhiarna dawhkan tinah pakhat zel duty-in, vote chhiar hi an vil dawn a ni.

Micro observer training thawh khatna chu November ni 22, 2023 khan buatsaih a lo ni tawh a ni.