620/2024-2025 

Champhai, the 31st May, 2024: Lok Sabha Inthlanpui, 2024 a vote tlate chhiar tura inpuahchahna kalpui mek zelah vawiin chawhma dar 11:00 khan District Election Office, Champhai buatsaihin DC Conference Hall-ah vote chhiar tura ruat Counting Supervisor leh Counting Assistant-te pual training thawhhnihna leh a hmawrbawkna buatsaih a ni.

He hun hmanpuitu Pu James Lalrinchhana, ARO & District Election Officer chuan Lok Sabha Inthlanpuia vote tlate chu June ni 4, 2024 a chhiar tur niin vawiinah inpuahchahna zawhfel vek tum a ni, a ti a. Kalkhawmte chu zawh duh leh hriat chian duh an neihte, mamawh leh tul an neihte inthlahrung hauh lova zawta thlen zel turin a chah a. Inrintawkna nen nuam ti taka vote chhiar tum turin a fuih a, duhsakna a hlan nghal bawk.

He hun hi Pu Benjamin Zalawma Ralte, Election Officer chuan kaihruaiin Counting Day Plan a sawifiah a. June ni 4, 2024 Thawhlehni zing dar 5:00 ah Counting Observer kaihruaiin Counting Official-te duty-na tur 'Third Randomization of Counting Officials' hmanga siamfela hriattir an nih dawn thu leh Reserve Counting Team-te chuan VVPAT Slip an chhiar dawn thu a sawi a. Pi Lalhruaitluangi, SO, State Level Master Trainer (SLMT) in Counting Supervisor leh Counting Assistant-te tihtur leh mawhphurhnate a sawifiah bawk.

Hemi hnu hian Counting Supervisor leh Counting Assistant-te hi EVM/VVPAT khawih dan leh vote tlate chhiar dan ataka entirna leh inzirtirna neih a ni bawk.