Vawiin khan Champhai District Legal Services Authority leh High Court Legal Services Committee, Gauhati High Court, Aizawl Bench-te tangkawp buatsaihin Dan lam inzirtirna leh Victims Compensation semna neih a ni a. He hun Govt. Champhai College Multipurpose Hall-a neih hi Justice Pu Michael Zothankhuma, Judge, Gauhati High Court leh Champhai District Porfolio Judge ni bawk chuan khuallian niin a hmanpui a. Victims Compensation hlanna a nei nghal a ni. 

Khuallian Justice Pu Michael Zothankhuma chuan Drugs chu tunlai khawvel buaipui ber anih avangin Police leh Excise lam chauh ni lo mipuite pawhin thuhretuah dingin dan kengkawhtute nasa takin kan pui ve thei a ni, a ti a. Dan kengkawhtu Police leh Excise-te pawh dan bawhchhetute manna kawngah tihsual a awm lohna turin dan in a phut ang thlapa thil ti tura fuihin, dan bute pawh nasa zawka chhiara zirchiang thin turin a chah a. Tihsual avanga dan bawhchhiate hrem loha an chhuah theih thin avangin dan kengkawhtute chu mawhphurhna sang tak an nei tih hriaa, fimkhur leh zual turin a chah a. Tun hma zawng aiin Legal Services Authority chuan a huang a zauh tawh a, Central Schemes hrang hrangte enkawltu Department-te leh Media lamte nena thawk hova mipuite hriat thiam theih tura puanzar chu hna pawimawh tak a ni, a ti bawk.

Pu Laldinpuia Tlau, MJS, Joint Registrar, Gauhati High Court, Aizawl Bench-in ‘Role of Enforcemnet Agency in War Against Drugs’ tih thupui hmangin dan anga ruihhlo do dan zirtirna a pe a. Ruihhlo do chu Mizo te indona hmachhawn lian ber anih avangin dan kengkawhtute chu dan ang thlapa dan bawhchhiate man turin a chah a. Mipuite chu ruihhlo zurte thuneitute hnena thlen a, dan anga hrem an nih theihna tura thuhretua tanga Police leh Excise-te tawiawm tlat turin a chah nghal a ni.

Pi Helen Dawngliana, MJS, Registrar, Gauhati High Court, Aizawl Bench & Secretary, HCLSC-in ‘The Rights of Women & Children’ tih thupui hmangin hmeichhia leh naupangte dikna leh chanvo humhalhna a zirtir a. Inchhung khura hmeichhiate chunga hleilenna hrang hrangte tarlangin hmeichhiate zahawmna ti bawrhbang lakah hremna a awm tih hriaa a rang lama thuneitute hnena thlen vat thin turin a chah a. Ro khawm theihna dan pawh siam that niin, hmeichhiate pawhin dan ang thlapin ro an khawm ve theih tawh thu a sawi a. Hmeichhiate chu ram leh hnam siam that kawngah mawhphurhna pawimawh tak an nei a ni tih hre thar leh turin a chah nghal a ni.

He hunah hian Pu Joel Joseph Denga, MJS, District & Sessions Judge and Chairman, DLSA Champhai chuan kalkhawmte lawmna thu a sawi a. Mi 21 te hnenah Mizoram Victims  of Crime Compensation Scheme, 2011 kaltlangin zangnadawmna pek an ni a. Pu R.Vanlalena, MJS, Addl. District & Sessions Judge, Champhai-in lawmthu sawiin hun a khar a ni.

Vawiin programme-ah hian Police leh Excise lama thawktute, Media, NGO aiawh, CWC member, JJB Member leh Bar Association Member-te an tel a ni.