Vawiin khan Social Welfare Department chuan ram pum huap chawimawina POSHAN Abhiyaan  National Award  leh   Pradhan Mantri Matru Vandana Yojna (PMMVY) National Award an dawn lawmna hun ATI Auditorium, Aizawlah an hmang a. Anganwadi Workers hna thawk thate hnenah chawimawina an hlan bawk. He hunah hian  Mizoram Chief Secretary Pu Arvind Ray chu khuallian niin National Health Mission Director Dr Lalrozama chu khual zahawm a ni.

PMMVY ah hian North East Region and Himalayan Areas zone-ah Mizoram hian State Award a la a, Serchhip District chuan District Award an la bawk. He lawmman hi September ni 7 khan New Delhi ah sem a ni. PMMVY hi sawrkar laipui Ministry of Women and Child Development in nu naupai leh hnute tuia nausen chawm mek (lactating mothers) te tana a buatsaih niin he hmalakna in a tum ber chu nuten hrisel taka nau an pai a, fa tha taka an hrin leh enkawl zui theihna tura tanpui a ni a. India ram pum hi zone hrang hranga then niin Mizoram hi hmar chhak State dangte leh Himalaya tlangdunga State lian tak tak Jammu and Kashmir, Himachal Pradesh leh Uttarakhand te nen huang khatah dah an ni a, heng zingah hian PMMVY-a State leh District titha chawimawina an dawng pha a ni. 

POSHAN Abhiyaan (National Nutrition Mission) ah hian Mizoram State chuan Maximum Reach across all theme tih category ah chawimawina sang State Award a dawng a. POSHAN Abhiyaan hnuaiah vek hian category hrang hrang pali ah mimal lawmman dawngtu an awm bawk a. Chungte chu :-

1) Leadership award - Pi WC Zorammawii, CDPO, Champhai

2) Field Functionary Individual Excellence  Award - Pi C.Lalremsiami, AWW, W Phaileng, Pi Lalthlamuani, AWW, Thingdawl

3) Field Functionary AAA - Pi Tlanghmingthangi,AWW;  Pi Lalngaihzuali, ASHA leh Pi Lalthuampuii, ANM, Ngopa

4) Field Functionary Village Convergence - Pi Lalrinpuii, Philadelphia Self Help Group; Pi Seldingpuii, Zobawm Self Help Group; Pi Ramengmawii, Sensiari Self Help Group leh Pi Lalmuansangi, Sensiari Self Help Group, W.Phaileng.

Mizoram chhunga Anganwadi Worker (AWW) thawk tha mi panga te hnenah vawiin vek khan State Level Award sem a ni bawk a. Kum 2017-2018 AWW State Level Award dawngtute chu pi H.Remsangpuii, Tanhril AWC-III, Tlangnuam ICDS Project; Pi Vanlalchhuangi, Kolasib AWC-III (Diakkawn), Thingdawl ICDS Project; Pi Zaithansangi, Lungsen AWC-IX, Lungsen ICDS Project; Pi Lalbiakthuami, Haulawng AWC-II, Lunglei ICDS Project leh Pi Lalmuanpuii, Hunthar AWC-I, Aizawl Urban ICDS Project te an ni.

Programme hi Social Welfare Secretary Pi K.Vanlalrawni'n a kaihruai a, Social Welfare Department Director Pi Laldikkimi'n keynote address a sawi a. Pi Zonunpari, Special Officer (N) leh Pi Zoramthangi Chhangte, Deputy Director (ICDS)  te chuan PMMVY leh POSHAN Abhiyan chungchang sawifiahna hun an hmang a ni.