Vawiin chawhnu khan Sawrkar laipui hriselna  programme pawimawh tak naupang kum hnih hnuai lam leh nu nau pai ten hri danna (Immunisation) an lak vek theihna tura duan Mission Indradhanush chungchanga hmalaknate DC Conference Hall, Champhaiah sawi ho a ni. He hun District Task Force for Immunisation buatsaih hi Pu K.Vanlalthiana, Additional DC Champhai chuan a kaihruai a ni.

Pu K.Vanlalthiana chuan naupangten hri laka indanna an dawn chu  an dikna leh chanvo ani a, Mission Indradhanush chuan naupangte dikna pek hi a tum tlat a ni, a ti a. Universal Immunisation Programme hnuaiah Mission Indradhanush chu December Ni 25, 2014 ah tan niin, kum 2020 chuan nausen za zela 90 te chu hri danna pek hman vek tum a nih thu a sawi a. Sawrkar laipui programme duante chu a hlawhtlin theihna turin a guideline ang taka kalpui hram hram a tul sawiin, dik taka hna kalpui chuan sawrkar laipui pawh tanpui turin a inhuam zau hle a ni, a ti a. Mission Indradhanush kalpuina tura District chhunga thawktu zawng zawngte chu fakawm a tih thu leh rawngbawlna a ngaia programme hlawhtling tak ni thei tura theihtawp chhuah chhunzawm zel turin a chah nghal a ni.

He hunah hian Dr.R.Lianmawia, District Immunisation Officer (DIO) Champhai chuan Mission Indradhabnush hnuaia hmalak tawhna leh hmachhawpte a tarlangin Immunisation Schedule a sawifiah a. Mission indradhanush hmangin naupang vaccine la lo leh la kimlo te bakah nu naupaite Tetanus Toxoid pek vek tum a nih thu a sawi a. Vaccine la thei tur zawn hna thawh mek anih thu leh tun thla ni 16, October, 2018 hian dawng turte hriat kim hman tum anih thu a sawi a, October Ni 22 hian a dawng turte hnenah Vaccine hi Health Sub-Centre  tinah te pek anih tur thu a sawi bawk.

DIO in a report danin tun dinhmunah vaccine course la kim tawh mipa naupang 1035 leh hmeichhe naupang 954 a vaiin 1989 an awma, thual nawn lehna nei tura thawh mek niin, la la ve lo leh la kimlo awm angte chuan Octobrer 22 hian an la ve leh dawn a ni. Heng bakah hian  hri  danna pek kawnga harsatna te sawilan niin, meeting chuan a zau thei ang bera mipuite hnena inhrilhhriatna neih nawn leh nise a ti a. Naupang leh nu naupaiten hri danna mumal tak an lak hi hriselna atana pawimawh hmasa anih avangin mitinte hemi kawngah hian tawiawm hram hram turin District Task Force for  Inmmunisation chuan a ngen nawn leh a ni.