1622/2022-2023
Champhai, the 16th August, 2022: Deen Dayal Antyodaya Yojana - National Urban Livelihood Mission (DAY-NULM) hnuaia khawpui chhunga chenna/innghahna mumal nei lote tana hmalakna, Shelter for Urban Homeless (SUH) kaltlanga Champhai District Hospital ram chhunga damlo awmpuitute innghahna riahbuk, Patients' Attendant Shelter (PAS) building sak dan tur leh, kum upate tlukluhna leh enkawlna hmun, Shelter for Senior Citizens sak dan tur chungchang ngaihtuahin vawiin chawhma dar 11 khan DAY-NULM City Level Executive Committee chu an Chairman Pu James Lalrinchhana, District Bawrhsap hovin I&PR Conference Hall, CHANEM-ah an thukhawm.

District Bawrhsap Pu James Lalrinchhana chuan District chhunga hmasawnna ruhrel siam pawimawh tak takte a puitlin theih nana ngaihven a tul thu sawiin, ngaihtuahna fim tak seng chunga enzui a tul a ni, a ti a. Hna tha leh tlo, ram leh hnam tana rotling, mipuite tana chhawrnahawm tak din a nih theih nan hnathawh kal lai mekte enfiah thin turin member tinte a chah a ni.

DUDO Champhai Pi R.Lalnunkimi, Member Secretary-in DAY-NLUM scheme leh agenda a sawifiah a. Hmalak tawh dan leh hmachhawpte a tarlang bawk.

Thukhawm chuan Champhai District Hospital ram chhunga damlo awmpuitute innghahna tur sak nana hmunhma mila drawing, plan leh estimate siamte chu a zirchian hnuah thuneitu sang zawka thlen turin a pawm a. DAY-NULM Shelter for Urban Homeless scheme hnuaia Patients' Attendant Shelter building sak nan leh bungraw tul angte lei nan hian Rs. 45,91,600 (cheng nuai sawmli panga, singkua sangkhat leh zaruk) ruahman a ni a. Hmunhma hman phalna hmuh tawh niin, mithiamten an endik tawh bawk a. Ruahman dan chuan mizo pa chhiara chhawng hnih, khum 18 awmna sak tum a ni.

Kum upate tlukluhna leh enkawlna hmun Shelter for Senior Citizens, New Champhaia sak mek second instalment pek chhuah chungchang pawh he hunah hian ngaihtuahho a ni a. City Level Executive Committee-in endik tura a ruat Shelter Management Committee leh Department mithiamte endiknate tarlana sawiho a ni a, thukhawm chuan hnathawh dante thlirin chhunzawm zel rem a ti a, second instalment Rs. 14,12,800 (cheng nuai sawmpali, singkhat sanghnih leh zariat) pawh pek chhuah rem a ti a. DAY-NULM hnuaia Urban Homeless Scheme (SUH) hnuaia Shelter for Senior Citizens sak nan hian Rs. 35,32,000 (cheng nuai sawmthum panga, singthum leh sanghnih) ruahman a ni.