1623/2022-2023
Dated Serchhip, the 16th August, 2022: Vawiin khan Er. Lalrinawma, Deputy Speaker chuan a bial chhung khua Darlawng Health Clinic Centre thar a hawng.

A hawnna inkhawm Clinic Centre thara buatsaihah Er.Lalrinawma chuan, khawtlang mipuite inpekna leh thawh hona tha tak zarah Health Clinic Centre thar an hawng thei ta tih sawiin, Centre a awm theih nana tha leh zung sengtute zawng zawng chungah lawmthu a sawi a. Zirna, eizawnna leh hriselna te chu a thil ngaihpawimawh ber ber te an nih reng thu a tarlangin Darlawng mipuite hriselna kawngah Centre thar chuan nasa taka a tanpui a beisei tih a sawi a, mipuite pawhin lo pan a, lo hmang tangkaia, a hmunhma leh building enkawl zui kawngah pawh theihtawp lo chhuah zui turin a chah a ni.

Dr. Lawrence Lalramenga, MO Thingsulthliah PHC pawhin thusawiin, tun hnaiah Thingsulthliah PHC hnuaiah Buhkangkawn leh Hmawngkawn ah Health Clinic Centre hawn thar an nih hnuin vawiinah Darlawng khuaah Clinic Centre thar kan han hawng leh thei hi a lawmawm hle a, hetianga hmasawnna duhawm tak tak a thlen theih nana beitu bialtu MLA leh kan Deputy Speaker Er. Lalrinawma chungah kan lawm hle a ni. Mipuite kan hrisel loh chuan kan thawhchhuah a pung thei lova hmasawnna a awm thei tak tak thin lo. Chuvang chuan hriselna hi thil pawimawh hmasa a ni a, mipuite pawhin kan nitin nunkawngah nunphung hrisel zawk kan uar deuh deuh a tul a ni. Harsatna kan tawh changin damdawiin pan vat nachang kan hriat pawh a tul hle a, he Centre thar pawh hi Darlawng mipuiten in lo hmang tangkai zel dawn nia, tiin a chah a ni.

Health Clinic Centre thar hawnna inkhawm hi Pu C. Zonunsanga, VCP in kaihruaiin Upa Vanlalvena’n hunserh a hmang a, Pu Lalthakima, VC Secretary in Clinic Centre Building an neih dan report tawi pe in Pu K.Rochhunga’n lawmthu sawina nen inkhawm a khar a ni